Kolhapur Municipal Corporation : गुडघाभर खड्ड्यांनी आणि भररस्त्यात दोन-दोन फुटांवर आलेल्या चॅनेलच्या झाकणांनी कोल्हापुरातील रस्त्यांची ख्याती महापालिकेनं सर्वदूर पोहोचवली आहे. हा दगडी कारभार सुरू असतानाच आता आणखी एका महापालिकेच्या कारभाराची लक्तरं वेशीवर टांगली गेली आहेत.
कोल्हापूर शहरातील दसरा चौकातून खानविलकर पंपाकडे जाणाऱ्या मार्गावर तीन स्पीडब्रेकर आहेत. मात्र, एकाही स्पीडब्रेकरवर ओळखून येण्यासाठी पांढरे पट्टे मारलेले नाहीत. त्यामुळे याठिकाणी दररोज एक, तरी अपघात ठरलेला असतो. शुक्रवारी नेहमीप्रमाणे पुन्हा एक अपघात झाला. यानंतर रात्री कोल्हापूर महापालिकेचे कर्मचारी धावत पांढरे पट्टे मारायला आले, पण रात्री मारलेले पट्टे आज सकाळी उठून बघतात तर गायब झाले आहेत.
शहर अभियंत्याना वर्षभरांनी जाग आली, पण 12 तासांत कारभार उघड्यावर
कोल्हापूर महापालिकेचे शहर अभियंता नेत्रदीप सरनोबत यांना अनेकवेळा याबाबत विनंती करण्यात आली होती. गेल्या वर्षभरापासून विनंती केल्यानंतर शुक्रवारी रात्री कामाला मुहूर्त मिळाला. मुहूर्त देखील असा मिळाला की, सकाळी पांढरे पट्टेच गायब झाले आहेत. त्यामुळे पालिकेच्या या कामाचं तोंड भरून कौतूक कोल्हापूरकर करत आहेत.
कोल्हापूरचे शहर अभियंता नेत्रदीप सरनोबत यांना अनेकवेळा माध्यमातील प्रतिनिधींनी अपघातास कारणीभूत ठरत असलेल्या स्पीड ब्रेकर पट्टे मारण्यासाठी विनंती केली होती. मात्र, त्यांनी वेळोवेळी उडवा उडवीची उत्तरे दिली. पुढील दहा मिनिटांत कर्मचारी पाठवून देतो, असे म्हणणाऱ्या नेत्रदीप सरनोबत यांनी कित्येक महिन्यांनी काल कर्मचाऱ्यांना पाठवले. मात्र त्यांनी केलेल्या कामाची देखील 12 तासांत दुर्दशा झाली आहे.
वयस्कर लोक आणि महिलांच्या अपघाताचे प्रमाण जास्त
कोल्हापूर शहरातील शासकीय कार्यालयात जात असताना याच मार्गावरून जावं लागतं. त्यामुळे हा रस्ता खूप रहदारीचा आहे. वयस्कर नागरिक आणि महिला देखील या मार्गावरून वाहन चालवत असतात. मात्र, स्पीड ब्रेकर दिसून येत नसल्याने त्यांना गाडीवर ताबा मिळवणे अवघड जाते आणि अपघात होतात.
महत्वाच्या इतर बातम्या :