Girish Mahajan : खासदार रक्षा खडसे यांचे तिकीट कापले जाणार का? पत्रकारांच्या प्रश्नावर गिरीश महाजन यांचं सूचक उत्तर

Girish Mahajan : खासदार रक्षा खडसे यांचे तिकीट कापले जाणार का असा प्रश्न पत्रकारांनी राज्याचे ग्रामविकास मंत्री गिरीश महाजन यांनी विचारलं. त्यावर महाजन यांनी सूचक उत्तर दिलं.

Girish Mahajan : राष्ट्रवादी काँग्रेसचे ज्येष्ठ नेते एकनाथ खडसे (Eknath Khadse) यांची सून म्हणून खासदार रक्षा खडसे (Raksha Khadse) यांचे तिकीट कापले जाणार का असा प्रश्न पत्रकारांनी राज्याचे ग्रामविकास मंत्री गिरीश महाजन (Girish Mahajan) यांनी विचारलं. त्यावर महाजन यांनी सूचक उत्तर दिलं. "ऐनवेळी काहीही होऊ शकते, आजच काही सांगता येणार नाही," असं गिरीश महाजन म्हणाले. मात्र महाजन यांचं हे उत्तर राजकीय क्षेत्रात चर्चेचा विषय बनला आहे.

'भाजपच्या पार्लमेंटरी बोर्डमध्येच उमेदवारांची नावं ठरतात'

"भाजपमध्ये पार्लमेंटरी बोर्ड आहे, तिथूनच सर्व नावं ठरतात. त्यामुळे ऐनवेळी काय होईल हे सांगता येत नाही. मागच्या वेळी तुम्ही पाहिलं असेल की ऐनवेळी तिकिटं कशी बदलतात. स्वर्गीय हरिभाऊ जावळे यांचं तिकीट कसं बदललं हे तुम्हाला माहिती आहे. त्यामुळे आज हे सांगणं कठीण होईल. पार्लमेंट बोर्ड हे सक्षम आहे आणि योग्य वेळी योग्य निर्णय ते घेतं," असं गिरीश महाजन यांनी म्हटलं.

'ऐनवेळी काहीही होऊ शकतं'

दरम्यान रावेर लोकसभा मतदारसंघाच्या जागेबाबत प्रश्न विचारल्यावर पुढे बोलताना मंत्री गिरीश महाजन म्हणाले की, रावेर लोकसभा मतदारसंघ हा सुरुवातीपासून भाजपचाच मतदारसंघ राहिलेला आहे. रक्षा खडसे यांनी केलेला दावा योग्यच आहे. त्यांनी त्यांच्या कार्यकाळात पंतप्रधान नरेंद्र मोदी यांच्या अनेक योजना मतदारसंघात राबवल्या, चांगल्या पद्धतीने काम केलं. मात्र उमेदवारीबाबत भाजपचे निर्मय हे हायकमांड घेत असतं. गेल्या काही वर्षांत पाहिलं तर भाजपचे माजी खासदार स्वर्गीय हरिभाऊ जावळे असतील, आमदार स्मिता वाघ असतील, तसेच खासदार उमेश पाटील ऐनवेळी कशा पद्धतीने या उमेदवारांची तिकिटं कापण्यात आली." "त्यामुळे हा भाजपच्या हायकमांडचा निर्णय आहे. ऐनवेळी काहीही होऊ शकतं, असं म्हणत रक्षा खडसे यांच्या लोकसभेच्या उमेदवारीबाबत मंत्री गिरीश महाजन यांनी सूचक वक्तव्य केलं आहे.

रक्षा खडसे यांचं तिकीट कापणार की पुन्हा उमेदवारी मिळणार?

गिरीश महाजन यांच्या रावेर लोकसभा मतदारसंघाच्या प्रतिक्रियेवरुन असं दिसून येत आहे की भाजपमध्ये असताना एकनाथ खडसे यांचं तिकीट कशाप्रकारे कापलं होतं. आता नाव न घेता मंत्री गिरीश महाजन यांनी खासदार रक्षा खडसेंच्या उमेदवारीबाबत सूचक वक्तव्य केलं आहे. त्यामुळे आगामी लोकसभा निवडणुकीत रावेर लोकसभा निवडणुकीत रक्षा खडसे यांचं तिकीट कट होतं का की त्यांना पुन्हा उमेदवारी मिळते, अशा चर्चांना आता उधाण आलं आहे.

हेही वाचा