नवी दिल्ली : योगगुरु बाबा रामदेव हे मागील काही दिवसांपासून त्यांच्या वादग्रस्त वक्तव्यांमुळे चर्चेचा विषय ठरत आहेत. अॅलोपॅथी उपचारपद्धतीसंदर्भात केलेल्या एका वक्तव्यासाठी त्यांना स्पष्टीकरणवजा माफीही मागावी लागली. इतकंच नव्हे तर आपले उदगार त्यांना परतही घ्यावे लागले. असं असलं इंडियम मेडिकल असोसिएशन यांच्यात अद्यापही खटके उडतच आहेत. याच वादाच्या भोवऱ्यात अडकलेलं असताना योगगुरु बाबा रामदेव यांनी एबीपी न्यूजला मुलाखत देत आपली बाजू स्पष्ट केली.
मी अॅलोपॅथी आणि डॉक्टरांच्या विरोधात नाही
आपल्या विधानावरुन वाद निर्माण झाल्याचं लक्षात आल्यानंतर भूमिका स्पष्ट करताना बाबा रामदेव म्हणाले, 'मी अॅलोपॅथी आणि डॉक्टरांच्या विरोधात नाही. आयएमएच्या विरोधात जाण्याचा प्रश्नच उदभवत नाही. ही लढाई तर, औषध माफियांच्या विरोधात आहे. जे 2 रुपयांचं औषध 2 हजार आणि केव्हा केव्हा तर 10 हजार रुपयांना विकतात. गरज नसतानाही शस्त्रक्रिया करतात.'
अनेकदा तर औषधांचा अधिक मारा केल्यानं काय परिणाम होतात हे तर एम्सचे संचालक रणदीप गुलेरिया यांच्याकडूनही आपण ऐकल्याचं म्हणत मी वाद संपवू इच्छितो असी ठाम भूमिका त्यांनी मांडली. मेडिकल सायंसनी एडवांस सर्जरी आणि आयुष्य वाचवणाऱ्या औषधांच्या रुपात मोठी प्रगती केली आहे. मी स्वत: मेडिकल सायंन्सचा आदर करतो. असं म्हणत असतानाच आयुर्वेदामुळंही अनेक जीवघेणे आणि दुर्धर आजार बरे होत असल्याचा दाखला त्यांनी दिला.
आयएमएबाबत काय म्हणाले बाबा रामदेव?
कोरोना लसीच्या संदर्भात संभ्रम निर्माण करणाऱ्या आरोपांसंदर्भातील प्रश्नाचं उत्तर देत बाबा रामदेव यांनी सांगितलं, 'मी तर म्हणालो होतो की, लसीचे दोन डोस घेण्यासोबतच आयुर्वेदाचेही दोन डोस घ्या'. आपल्याला देशद्रोही म्हणणाऱ्या आयएमएनं कशा प्रकारे संविधानाविरोधात वक्तव्य केलं आहे, लोकशाहीविरोधात वक्तव्य केलं आहे, भारतीय संस्कृतीविरोधात वक्तव्य केलं आहे हे सांगत आपण आयएमएचा फार गांभीर्यानं विचार करत नसल्याचं त्यांनी ठामपणे सांगितलं.
गर्दीच करणार असाल तर कठोर निर्णय घ्यावा लागेल; महापौर किशोरी पेडणेकरांचा मुंबईकरांना इशारा
कोरोनाची लस केव्हा घेणार?
कोरोना प्रतिबंधात्मक लस केव्हा घेणार या प्रश्नाचं उत्तर देताना आपण लसीचं समर्थन करत असल्याचं सांगत लसीसाठी प्रथम लहान मुलं आणि वयोवृद्धांना प्राधान्य द्यावं असा आग्रही सुर आळवला. 'स्वामी रामदेव इतके सुदृढ आहेत, माझं हृदय नीट काम करत आहे, माझा रक्तदाब योग्य आहे, माझी किडनी ठीक आहे, यकृतही ठिक आहे', असं म्हणत आपल्या रोगप्रतिकारक शक्तीवर त्यांनी प्रकाश टाकत आपण लसीसाठीच्या अंतिम यादील नाव नोंदणी केल्याचं त्यांनी सांगितलं.