Army Dogs: कुत्रा हा माणसाचा सर्वात विश्वासू मित्र आहे, असे म्हटले जाते. शत्रूचा शोध घेण्यासाठी भारतीय लष्करही याचा वापर करते. भारतीय लष्कर निवृत्तीनंतर आपल्या कुत्र्यांना आणि घोड्यांना गोळ्या घालते, असे अनेक लोक म्हणताना तुम्ही ऐकलं असेल. इंटरनेटवरील अनेक रिपोर्टमध्ये असा दावा करण्यात आला आहे की, कुत्र्यांची सेवा संपल्यानंतर त्यांना मारले जाते. लष्कराच्या या वागणुकीबाबत अनेक प्रकारचे आरोपही केले जातात. याला अमानवी काम देखील म्हटलं जात. पण भारतीय लष्कर खरंच कुत्र्यांना गोळी घालत ठार करते का? यामागचं नेमकं सत्य काय आहे, हे आपण या बातमीत जाणून घेणार आहोत....


Army Dogs: लष्करात कुत्र्यांचीही केली जाते भरती 


भारतीय लष्करातील सैनिकांप्रमाणेच कुत्र्यांचीही भरती करून त्यांना विशेष प्रशिक्षण दिले जाते. प्रशिक्षणात ते बॉम्ब किंवा कोणत्याही स्फोटकांचा वास घेण्यासाठी तयार केले जातात. लष्करात प्रामुख्याने लॅब्राडोर, जर्मन शेफर्ड, बेल्जियन शेफर्ड जातीच्या कुत्र्यांची भरती केली जाते. या कुत्र्यांना रँक आणि नावे देखील दिली जातात, तसेच त्यांच्या निवृत्तीवर अनेक विधी देखील फॉलो केले जातात. 


Army Dogs: कुत्र्यांना खरच गोळी घालून ठार केलं जात का?


द प्रिंटशी बोलताना लष्कराच्या प्रवक्त्याने सांगितले की, हे चुकीचे आहे. द प्रिंटच्या वृत्तानुसार, लष्कराच्या प्रवक्त्याने सांगितले की, 2015 मध्ये सरकारच्या मंजुरीनंतर लष्कराने प्राण्यांचं इच्छामरण थांबवले आहे. म्हणजेच निवृत्तीनंतर कुत्र्यांना लष्कराकडून गोळ्या घातल्या जात नाहीत. त्यांनी पुढे सांगितले की, इच्छामरण फक्त त्यांनाच दिले जाते ज्यांना असाध्य आजार आहेत.


Army Dogs: कुत्र्यांना गोळी घालण्याच्या दाव्याचे काय आहे सत्य?


लष्कराच्या कुत्र्यांना गोळ्या घालण्याच्या दाव्यामागे असे म्हटले जाते की, भारतीय लष्कराने देशाच्या सुरक्षेचा विचार करून हे करते. निवृत्तीनंतर कुत्रा चुकीच्या हातात पडला तर खूप अडचण निर्माण होऊ शकते, अशी भीती लष्करातील जवानांना असायची. त्यांचा कोणी गैरवापर करू नये, म्हणून या कुत्र्यांना गोळ्या घातल्या जातात. यासोबतच लष्कराच्या सुरक्षित आणि गुप्तचर तळांची संपूर्ण माहिती कुत्र्यांकडे असल्याचेही सांगण्यात येत आहे.


Army Dogs: निवृत्तीनंतर या कुत्र्यांचे काय होते?


आता प्रश्न असा आहे की, निवृत्तीनंतर लष्करातील कुत्र्यांचे काय केले जाते? भारतीय लष्कराने दिलेल्या माहितीनुसार, सेवानिवृत्तीनंतर या कुत्र्यांना मेरठ (कुत्र्यांसाठी) आणि उत्तराखंडमधील हेमपूर (घोड्यांसाठी) वृद्धाश्रमात पाठवले जाते. जिथे त्यांची विशेष काळजी घेतली जाते आणि त्यांना राहण्यासाठी जागा दिली जाते.