Petrol Diesel Rates : काही महिन्यांपूर्वी सुरु असणारी निवडणुकांची सत्र आता संपली आणि पाहता पाहता याचीच प्रचिती येऊ लागली ती म्हणजे इंधनाच्या वाढत्या दरांमुळे. पेट्रोल आणि डिझेलच्या दरांनी आधीच सर्वसामान्यांच्या खिशाला झळ पोहोचवलेली असताना आता दर दिवशी हे दर बहुतांश भागांमध्ये शंभरीचा आकडा ओलांडताना दिसत आहेत. त्यामुळं नागरिकांचा प्रवासही महागल्याचीच स्पष्ट चिन्हं आहेत.
शुक्रवारी नव्यानं समोर आलेल्या आकडेवारीनुसार देशाच्या राजधानीमध्ये म्हणजेच दिल्लीत, पेट्रोल आणि डिधेलचे दर अनुक्रमे 96.93 आणि 87.69 रुपये प्रतिलीटर इतके असल्याचं सांगण्यात आलं. तर मुंबईत पेट्रोलचे दर 102.82 रुपये आणि डिझेल 94.84 रुपये प्रति लीटरन विकलं जात असल्याची माहिती समोर आली. भोपाळमध्ये पेट्रोल आणि डिझेलच्या किंमती अनुक्रमे 104.53 आणि 95.75 रुपये प्रतिलीटर असल्याचं दिसून आलं.
यंदाच्या वर्षात चार मे नंतर पेट्रोल, डिझेलच्या दरांमध्ये 24व्या वेळा वाढ झाल्याचं पाहायला मिळालं. या दरम्यान पेट्रोलच्या दरात 5.50 रुपये आणि डिझेलच्या दरात 6.63 रुपये प्रति लिटर वाढ झाली आहे. महत्वाचं म्हणजे आंतरराष्ट्रीय स्तरावर कच्चा तेलाच्या किंमतीत घट होत असताना भारतात मात्र इंधनाच्या दरात वाढ होत आहे.
पेट्रोल आणि डिझेलचे दर कुठे आणि कसे पाहाल?
इंडियन ऑईलच्या वेबसाईटवर https://iocl.com/Products/PetrolDieselPrices.aspx पेट्रोल डिझेलचे दर सोप्या पद्धतीने पाहता येतील.
इंडियन ऑईलचं IndianOil ONE Mobile App तुमच्या मोबाईलवर डाऊनलोड करुन तुम्ही तुमच्या जवळच्या इंडियन ऑईल पेट्रोल पंपावरील इंधनाचे दर जाणून घेऊ शकता.
पेट्रोल आणि डिझेलच्या किंमती एसएमएसद्वारे देखील कळू शकतात. इंडियन ऑईलच्या वेबसाईटने दिलेल्या माहितीनुसार, RSP आणि स्पेस देऊन आपल्या शहराचा कोड टाकून 92249992249 या क्रमांकावर एसएमएस करायचा आहे. हा कोड इंडियन ऑईलच्या वेबसाईटवर मिळेल. (शहरांचे कोड इंडियन ऑईलच्या वेबसाईटवर देण्यात आले आहेत).