पणजी : जैसी करनी वैसी भरनी, असं म्हटलं जातं, याची प्रचिती गोव्यात आली आहे. उत्तर गोव्यातील हडफडे येथे वृद्ध नोकराने आपल्या वृद्ध मालकीणीची डोक्यात लोखंडी पाईप मारुन हत्या केली. हत्या करून पळून जाताना पडल्याने गंभीर जखमी झालेल्या नोकराचाही मृत्यू झाला आहे.
पोलीस सूत्रांकडून मिळालेल्या माहितीनुसार, शिरीन मोदी ही 65 वर्षीय वृद्ध महिला मूळ मुंबईची असून गेल्या 20 ते 22 वर्षांपासून ती कुटुंबीयांसोबत वेगसवाडा- हडफडे येथे राहत होती. त्यांच्याकडे प्रफुल्ल जना (65) हा मूळ ओरिसाचा व्यक्ती नोकर म्हणून गेल्या 3 वर्षांपासून काम करत होता. प्रफुल्ल हा मोदी यांच्या घरापासून जवळच भाड्याच्या घरात राहत होता.
रविवारी सकाळी 10.30 च्या सुमारास शिरीन मोदी व प्रफुल्ल जना यांच्यात काही कारणावरून जोरदार भांडण झाले. भांडणांनंतर संतापाच्या भरात प्रफुल्लने रागात घराबाहेर पडलेला लोखंडी पाईप उचलून शिरीन मोदी यांच्या डोक्यात मारला आणि तो तेथून पळून गेला.
प्रफुल्लने केलेल्या हल्ल्यात शिरीन मोदी या गंभीर जखमी झाल्याने त्यांच्या घरच्यांनी त्यांना ताबडतोब रुग्णालयात नेले, मात्र डॉक्टरांनी त्यांना मृत घोषित केले. दरम्यान प्रफुल्ल जना हा शिरीनवर हल्ला करुन पळून जात असताना रस्त्यावर पडून जखमी झाला. रस्त्यावरुन जाणाऱ्या लोकांनी 108 रुग्णवाहिका बोलावून त्याला जिल्हा रुग्णालयात नेले. मात्र तेथील डॉक्टरांनी प्रफुल्लला मृत घोषित केले.