PM Modi Germany and UAE Visit : प्रधानमंत्री नरेंद्र मोदी (PM Narendra Modi) 26 जून ते 28 जूनदरम्यान जर्मनी (Germany) आणि संयुक्त अरब अमिरातीच्या (UAE) दौऱ्यावर आहेत. प्रधानमंत्री मोदी जर्मनीमध्ये जी-7 शिखर संमेलनात (G-7 Summit) सहभागी होणार आहेत. यासह ते माजी राष्ट्रपती आणि अबू धाबीचे शासक शेख खलिफा बिन झायेद अल नाहयान यांच्या निधनावर शोक व्यक्त करण्यासाठी यूएईचा दौरा करतील. याआधी 2 मे रोजी पंतप्रधान जर्मनीच्या दौऱ्यावर गेले होते. यावेळी जर्मनीचे चान्सलर (German Chancellor) ओलाफ स्कोल्स यांनी पंतप्रधान मोदी यांना जी 7 शिखर संमेलनात सहभागी होण्यासाठी आमंत्रण दिलं.


जर्मनीच्या अध्यक्षतेखाली होत असलेल्या शिखर परिषदेला हजेरी लावत पंतप्रधान मोदी जर्मन चान्सलर ओलाफ स्कोल्झ यांच्या निमंत्रणावरून श्लोस एलमाऊला (Schloss Elmau) भेट देतील. या परिषदेदरम्यान पंतप्रधान पर्यावरण, ऊर्जा, हवामान, अन्न सुरक्षा, आरोग्य, लैंगिक समानता आणि लोकशाही या विषयांवर आपले विचार मांडतील अशी अपेक्षा आहे. या महत्त्वाच्या मुद्द्यांवर आंतरराष्ट्रीय सहकार्य मजबूत करण्याच्या प्रयत्नांचा भाग म्हणून परिषदेसाठी अर्जेंटिना, इंडोनेशिया, सेनेगल आणि दक्षिण आफ्रिका यासारख्या इतर लोकशाही देशांनाही आमंत्रित करण्यात आलं आहे.


पंतप्रधानांची सहभागी देशांच्या नेत्यांशी द्विपक्षीय चर्चा
G7 शिखर परिषदेच्या पार्श्‍वभूमीवर पंतप्रधान मोदी काही सहभागी देशांतील नेत्यांसोबत द्विपक्षीय बैठका घेणार आहेत. भारत आणि जर्मनी यांच्यातील मजबूत आणि घनिष्ठ संबंधांमुळे G7 शिखर परिषदेसाठी भारताला निमंत्रण देण्यात आलं आहे. 


युएईच्या शासकाच्या निधनावर शोक व्यक्त करणार आहेत
G7 शिखर परिषदेनंतर पंतप्रधान मोदी 28 जून रोजी संयुक्त अरब अमिरातीला (UAE) भेट देणार आहेत. येथे ते संयुक्त अरब अमिरातीचे माजी राष्ट्रपती शेख खलिफा बिन झायेद अल नाह्यान यांच्या निधनाबद्दल शोक व्यक्त करतील. युएईचे नवे अध्यक्ष आणि अबुधाबीचे शासक म्हणून निवड झाल्याबद्दल पंतप्रधान मोदी महामहिम शेख मोहम्मद बिन झायेद अल नाहयान यांचं अभिनंदन करतील. पंतप्रधान मोदी 28 जून रोजी रात्री संयुक्त अरब अमिरातीहून भारतासाठी रवाना होतील.


भारतीय वेळेनुसार पंतप्रधान मोदी यांचं जर्मनी येथील वेळापत्रक



  • पंतप्रधान नरेंद्र मोदी शनिवारी रात्री 12 वाजता जर्मनीसाठी रवाना झाले

  • रविवारी सकाळी 8.45 वाजता म्युनिक विमानतळावर उतरतील.

  • सकाळी 9.35 ला हॉटेलला पोहोचतील.

  • सायंकाळी 6.30 वाजता सामुदायिक कार्यक्रमात ऑडी डोममध्ये सहभागी होतील.

  • रात्री 9.30 वाजता अर्जेंटिनाच्या राष्ट्राध्यक्षांची भेट

  • दुपारी 11.30 वाजता बव्हेरियाच्या अध्यक्षांची भेट


महत्त्वाच्या इतर बातम्या