Petrol and Diesel Price Today 06 October 2021 : देशात इंधनदरवाढीचं सत्र काही थांबण्याचं नाव घेईना. सततच्या वाढणाऱ्या इंधनाच्या किमतीमुळं महागाईचा मारा सहन करणाऱ्या सर्वसामान्यांच्या खिशाला कात्री बसत आहे. आतंरराष्ट्रीय बाजारात ज्या वेगानं कच्च्या तेलाच्या (Crude Oil) किमतींमध्ये वाढ होत आहे. त्याचप्रमाणे देशात पेट्रोल-डिझेलच्या दरांतही झपाट्यानं वाढ होत आहे.
सध्या देशात पेट्रोल-डिझेलच्या किमती (Fuel Price) ऐतिहासिक उंचीवर आहेत. ऑक्टोबरमध्ये पेट्रोल-डिझेलच्या किमतींत मोठ्या प्रमाणावर वाढ झाली आहे. आंतरराष्ट्रीय स्तरावर तेलाच्या किमतींनी 2014 नंतर पहिल्यांदाच उच्चांक गाठला आहे. जागतिक बेंचमार्क ब्रेंट $ 81 प्रति बॅरल पार केलं आहे. त्यामुळे देशभरातही इंधनाचे दर वाढण्यासोबतच पेट्रोल-डिझेलच्या किमती दररोज नवा उच्चांक गाठत आहे.
सरकारी तेल कंपनीनं दिलेल्या माहितीनुसार, आज (बुधवारी) पेट्रोलच्या किमतींमध्ये 30 पैसे प्रति लिटर आणि डिझेलच्या किमतींमध्ये 35 पैसे प्रति लिटरची वाढ करण्यात आली आहे. त्यासोबतच राष्ट्रीय राजधानी दिल्लीमध्ये पेट्रोलचे दर 102.94 रुपये प्रति लिटर आणि मुंबईमध्ये 108.96 रुपयांवर पोहोचलं आहे. डिझेलच्या किमतींमध्येही मोठी वाढ झाली असून दिल्लीत 91.42 रुपये प्रति लिटर आणि मुंबईत 99.17 रुपये प्रति लिटरचा उच्चांक गाठला आहे.
देशातील प्रमुख महानगरांतील दर :
| देशातील महत्त्वाची शहरं | पेट्रोल रुपये/लिटर | डिझेल रुपये/लिटर |
| दिल्ली | 102.94 | 91.42 |
| मुंबई | 108.96 | 99.17 |
| कोलकाता | 103.65 | 94.53 |
| चेन्नई | 100.49 | 95.93 |
ऑक्टोबरमध्ये आतापर्यंतची पाचवी वाढ
ऑक्टोबरमध्ये एका आठवड्याहून कमी वेळात पेट्रोलच्या किमतींमध्ये पाचवी वाढ झाली आहे. 24 सप्टेंबरपासून आतापर्यंत डिझेलच्या किमतींमध्ये 2 रुपये 80 प्रति लिटरची वाढ झाली आहे. 28 सप्टेंबरपासून आतापर्यंत 1 रुपये 80 पैसे प्रति लिटर महाग झालं आहे. या महिन्यात आतापर्यंत एक दिवस (04 ऑक्टोबर) पट्रोल-डिझेलचे दर स्थिर होते.
पेट्रोल-डिझेल GSTमध्ये घेण्यासाठी का तयार नाही केंद्र आणि राज्य सरकार?
केंद्र सरकारनं कर प्रणालीमध्ये सुधारणांची गरज असल्याचं कारण देत जीएसटी (GST) लागू केला होता. पण जीएसटीमध्ये पेट्रोल आणि डिझेलचा समावेश करण्यात आलेला नाही. तसेच देशातील बहुतांश राज्य सरकारचंही हेच मत आहे की, पेट्रोल-डिझेलचा जीएसटीच्या कक्षेत समावेश केला जाऊ नये. पण का? यामुळे काय फायदा होणार? यांसारखे अनेक प्रश्न आपल्या सर्वांच्या मनात निर्माण झाले आहेत. जाणून घेऊया यामागील कारणं...
पेट्रोल-डिझेलच्या किमती जीएसटीच्या कक्षेत आणण्याची केंद्र सरकारसोबत राज्य सरकारचीही इच्छा नाही. कारण सरकारला चिंता आहे ती, देशाच्या तिजोरीची. सामान्य माणसाला दिलासा देता-देतो, देशाच्याच तिजोरीत खडखडाट होण्याची भिती सरकारला वाटतेय. जर पेट्रोल-डिझेलचा समावेश जीएसटीच्या कक्षेत केला, तर पेट्रोल-डिझेलच्या किमती अर्ध्या होणार. आजच्या किमतीनुसार जर अंदाज लावला तर, पेट्रोल 56 रुपये प्रति लिटर आणि डिझेल 55 रुपये प्रति लिटर विकलं जाईल.
पेट्रोल आणि डिझेलचे दर कुठे आणि कसे पाहाल?
इंडियन ऑईलचं IndianOil ONE Mobile App तुमच्या मोबाईलवर डाऊनलोड करुन तुम्ही तुमच्या जवळच्या इंडियन ऑईल पेट्रोल पंपावरील इंधनाचे दर जाणून घेऊ शकता.
इंडियन ऑईलच्या वेबसाईटवर https://iocl.com/Products/PetrolDieselPrices.aspx पेट्रोल डिझेलचे दर सोप्या पद्धतीने पाहता येतील.
पेट्रोल आणि डिझेलच्या किंमती एसएमएसद्वारे देखील कळू शकतात. इंडियन ऑईलच्या वेबसाईटने दिलेल्या माहितीनुसार, RSP आणि स्पेस देऊन आपल्या शहराचा कोड टाकून 92249992249 या क्रमांकावर एसएमएस करायचा आहे. हा कोड इंडियन ऑईलच्या वेबसाईटवर मिळेल. (शहरांचे कोड इंडियन ऑईलच्या वेबसाईटवर देण्यात आले आहेत).