Jammu Kashmir : दहशतवादी संघटनांनी गेल्या चार वर्षांत जम्मू आणि काश्मीरमध्ये 700 तरुणांची भरती केली आहे, तर सध्या केंद्रशासित प्रदेशात 141 सक्रिय दहशतवादी आहेत, त्यापैकी बहुतेक विदेशी आहेत. अधिकाऱ्यांच्या म्हणण्यानुसार, जम्मू-काश्मीरमध्ये मोठ्या प्रमाणात दहशतवाद्यांची भरती सुरू असून, सध्या सीमेपलीकडे असलेल्या दहशतवादी तळांमधून घुसखोरी सुरू असल्याचे सूचित करते.
82 विदेशी आणि 59 स्थानिक दहशतवादी सक्रिय
केंद्रीय गृह मंत्रालयाच्या आकडेवारीनुसार, 5 जुलै 2022 पर्यंत जम्मू-काश्मीरमध्ये एकूण 82 विदेशी दहशतवादी आणि 59 स्थानिक दहशतवादी सक्रिय होते. या संदर्भात माहितीचा हवाला देत एका अधिकाऱ्याने सांगितले की, हे दहशतवादी प्रामुख्याने जैश-ए-मोहम्मद आणि हिजबुल मुजाहिद्दीन याशिवाय लष्कर-ए-तैयबा, त्याची संलग्न संघटना द रेझिस्टन्स फ्रंट यासारख्या संघटनांतील आहेत.
जून अखेरपर्यंत 69 तरुणांची भरती
विविध दहशतवादी संघटनांनी गेल्या चार वर्षांत जम्मू काश्मीरमध्ये 700 स्थानिक तरुणांची भरती केली आहे, त्यापैकी 2018 मध्ये 187, 2019 मध्ये 121, 2020 मध्ये 181 आणि 2021 मध्ये 142 तरुणांची भरती करण्यात आली होती. या वर्षी जून अखेरपर्यंत 69 तरुणांची दहशतवादी संघटनांनी भरती केली आहे.
125 दहशतवाद्यांना केले ठार
त्याचवेळी, सुरक्षा दलांनी या वर्षात आतापर्यंत 55 चकमकीत 125 दहशतवाद्यांना ठार केले आहे. यावर्षी दहशतवादी घटनांमध्ये आतापर्यंत दोन सुरक्षा जवानांना आपला जीव गमवावा लागला आहे तर 23 जण जखमी झाले आहेत. या वर्षी जम्मू-काश्मीरमध्ये 20 नागरिकांचाही बळी गेला आहे. यासोबतच या वर्षात केंद्रशासित प्रदेशात आठ ग्रेनेड हल्ले झाले आहेत. आकडेवारीनुसार, 2021 मध्ये जम्मू-काश्मीरमध्ये झालेल्या दहशतवादी घटनांमध्ये 146 दहशतवादी आणि 41 नागरिकांचा मृत्यू झाला आणि तीन सुरक्षा कर्मचाऱ्यांनाही आपला जीव गमवावा लागला. गेल्या वर्षी दहशतवादी घटनांमध्ये एकूण 63 सुरक्षा कर्मचारी जखमी झाले होते.
संबंधित बातम्या