12 वर्षाखालील बालिकेवर बलात्कार झाल्याचं सिद्ध झालं, तर दोषीला सर्वोच्च शिक्षा सुनावली जाणार आहे. हरियाणाचे मुख्यमंत्री मनोहर लाल खट्टर यांनी व्यथित होऊन काही महिन्यांपूर्वी हा प्रस्ताव मांडला होता. त्यानंतर हरियाणा विधानसभेने गुरुवारी या ऐतिहासिक कायद्याला एकमताने मंजुरी दिली.
भाजपसोबतच इंडियन नॅशनल लोकदल आणि काँग्रेस आमदारांनीही या विधेयकाला पाठिंबा दिला. विशेष म्हणजे, बलात्कार पीडितेचं वय काहीही असो, दोषींना फाशीच हवी, अशी मागणीही काँग्रेस आमदार किरण चौधरींनी केली.
बारा वर्षांखालील बालिकेवर बलात्कार करणाऱ्याला फाशी
यापूर्वी, मध्य प्रदेश आणि राजस्थान सरकारने बलात्काराच्या घटना रोखण्यासाठी बारा वर्षाखालील मुलींवर बलात्कार करणाऱ्यास फाशीची शिक्षा ठोठावण्याचं विधेयक मंजूर केलं होतं.
'कलम 376- अअ'नुसार 12 वर्षांखालील बालिकेवर बलात्कार झाल्यास मृत्यूदंड किंवा 14 वर्षांपेक्षा जास्त कारावासाची तरतूद आहे. हा कारावास कैद्याच्या नैसर्गिक मृत्यूपर्यंत वाढवलाही जाऊ शकतो.
'कलम 376- डअ'नुसार 12 वर्षांखालील बालिकेवर एकापेक्षा जास्त व्यक्तींनी बलात्कार (सामूहिक बलात्कार) केला, तर दोषींना 20 वर्षांपेक्षा जास्त कालावधीचा सश्रम कारावास ठोठावला जाऊ शकतो.
बारा वर्षांखालील बालिकेवर बलात्कार करणाऱ्या दोषीला फाशीची शिक्षा करणारा कायदा महाराष्ट्रात कधी होणार, असा प्रश्न या निमित्ताने उपस्थित केला जात आहे.