काँग्रेसचे दिग्गज नेते ज्योतिरादित्य शिंदे पक्ष सोडणार?
एबीपी माझा वेब टीम | 25 Nov 2019 04:39 PM (IST)
महाराष्ट्रातील बंड सुरु असतानाच मध्य प्रदेशातही अशीच काही चर्चा सुरु झाली आहे. काँग्रेसचे मध्य प्रदेशातील प्रमुख नेते व माजी मंत्री ज्योतिरादित्य शिंदे यांनी आपल्या ट्वीटर प्रोफाइलमध्ये बदल केला आहे. त्यामुळं राजकीय वर्तुळात चर्चांना उधाण आलं आहे.
नवी दिल्ली : काँग्रेसचे दिग्गज नेते ज्योतिरादित्य शिंदे यांनी आपल्या ट्वीटर अकाउंटवरील बायोमधून काँग्रेसच्या पदाचा उल्लेख हटवला आहे. त्यामुळं ज्योतिरादित्य हे काँग्रेसपासून दूर जात असल्याच्या चर्चांनी जोर धरला आहे. मात्र, या चर्चा निराधार असल्याची प्रतिक्रीया ज्योतिरादित्य शिंदे यांनी दिली आहे. "माझ्या ट्वीटर अकाउंटवरील बायोमध्ये बदल असून तो छोटा केला आहे, सध्या यासंदर्भात सुरू असलेल्या चर्चांना कुठलाही आधार नाही", असे ज्योतिरादित्य शिंदे यांनी सांगितले आहे. दरम्यान, सध्या लोकसेवक आणि क्रिकेटप्रेमी, असा बायो ज्योतिरादित्य शिंदे यांनी केला आहे. काही महिन्यापूर्वी महाराष्ट्र व हरियाणा या दोन प्रमुख राज्यांमध्ये विधानसभेची रणधुमाळी सुरु असताना काँग्रेस नेत्यांमध्ये आरोप प्रत्यारोप सुरु होते. त्याचदरम्यान, ज्योतिरादित्य शिंदे यांनी देखील काँग्रेसला आत्मपरिक्षणाची गरज असल्याचे म्हणत घरचा आहेर दिला होता. त्यामुळं काँग्रेसमध्ये सर्वकाही आलबेल नसल्याचे समोर आले होते. तर, लोकसभा निवडणुकीत काँग्रेसला आलेल्या अपयशानंतर ज्योतिरादित्य शिंदे पक्षातील अंतर्गत मुद्यांवरून नाराज असल्याचे अनेकदा दिसून आले आहे. शिवाय, राहुल गांधी यांनी काँग्रेस अध्यक्ष पदाचा राजीनामा दिल्यानंतर ज्योतिरादित्य शिंदे यांनी देखील सरचिटणीस पदाचा राजीनामा दिला होता.