पाचशे-हजार नोटाबंदीचा लग्नघरांना फटका, सोनं-कपडे खरेदी रखडली
एबीपी माझा वेब टीम | 10 Nov 2016 06:41 PM (IST)
मुंबई : ऐन लग्नसराईच्या काळात जुन्या पाचशे आणि हजार रुपयांच्या नोटा बंद झाल्याचा फटका देशभरातल्या काही कुटुंबांना बसला आहे. त्यामुळे या ऐतिहासिक निर्णयाचं स्वागत होतानाच अपवादात्मक परिस्थितीत काही जणांना त्याचा फटकाही बसला आहे. लग्नासाठी दागिन्यांची खरेदी करायची आहे. पण अचानकपणे सोन्याचे दर वाढले आहेत. त्यामुळे काही कुटुंबांची चिंता वाढली आहे. शिवाय कपड्यांची खरेदी करण्यासाठी मोठ्या प्रमाणावर नवीन नोटा लागतात. त्याची तरतूदही झाली नाही. मुंबईतील घाटकोपरमध्ये सत्यदेवी शर्मा यांच्या घरी मुलाचं लग्न आहे. 8 डिसेंबरला लग्न होणार आहे. पण त्या लग्नाच्या तयारीसाठीची खरेदी रखडली आहे. त्यामुळे शर्मा कुटुंबाप्रमाणे अनेक परिवारांची चिंता वाढली आहे. अर्थात या कुटुंबांकडे डेबिट कार्डद्वारे शॉपिंग करण्याचा पर्याय उपलब्ध आहे. मात्र किरकोळ खरेदी करण्यासाठी दोन-तीन दिवस अडचणी येण्याची शक्यता आहे.