भोसरी एमआयडीसीमध्ये बेकायदेशीररित्या जमीन खरेदी केल्याचे पुरावे खडसेंच्याविरोधात आहेत. त्यामुळे खडसेंना मंत्रिमंडळातून हटवलं जाण्याची शक्यता वर्तवली जात आहे.
सूत्रांनी दिलेल्या माहितीनुसार मुख्यमंत्री देवेंद्र फडणवीस, प्रदेशाध्यक्ष रावसाहेब दानवे, भाजपचे प्रभारी सरोज पांडे खडसेंसंदर्भातला रिपोर्ट अमित शहांना सादर करतील.
याप्रकरणी पक्षाने आणि मुख्यमंत्र्यांनी खडसेंचं स्पष्टीकरणही मागितलंय. मात्र या स्पष्टीकरणामुळे अमित शाह समाधानी झाले नाही, तर त्यांची मंत्रिमंडळातून हकालपट्टी केली जाऊ शकते.
विशेष म्हणजे दोन दिवसांपूर्वी झालेल्या मंत्रिमंडळाच्या बैठकीलाही एकनाथ खडसेंनी हजेरी लावली नाही. शिवाय जळगावमध्ये खडसेंनी लालदिव्याची गाडीही वापरली नाही. त्यामुळे खडसेंचं मंत्रिपद जाणार की त्यांचं फक्त महसूलमंत्रिपद काढून घेतलं जाणार हे पाहणं महत्वाचं आहे.
खडसेंवरील आरोप
*कथित पीए गजानन पाटीलकडून खडसेंच्या नावे 30 कोटी लाच मागितल्याचा आरोप, गजानन पाटीलला अटक
*जावयाची लिमोझिन कार बेकायदा असल्याचा आरोप
*दाऊदच्या कॉलर लिस्टमध्ये खडसेंचा नंबर असल्याचा हॅकरचा दावा
* भोसरी एमआयडीसीतील जमीन खरेदी वाद