एक लाख 54 हजार 596 मतदार आपला मतदानाचा हक्क बजावणार आहेत. छत्तीसगडच्या सत्तारुढ भाजप मंत्रिमंडळातील नऊ मंत्री, विधानसभेचे अध्यक्ष आणि काँग्रेसच्या काही महत्त्वाच्या नेत्यांचं भवितव्य आज मतपेटीत बंद होणार आहे. सकाळी दहा वाजेपर्यंत साडेबारा टक्के मतदानाची नोंद झाली आहे.
72 जागांसाठी भाजप आणि काँग्रेसचे प्रत्येकी 72 उमेदवार रिंगणात आहेत. याशिवाय आप (68), जनता काँग्रेस (अजित जोगी) (47), आंबेडकर पार्टी ऑफ इंडिया (एपीआय) (40), बसप (27), इतर (229), अपक्ष (493) उमेदवार निवडणूक लढवत आहेत. एकूण 1 हजार 79 उमेदवार रिंगणात असून यामध्ये 111 महिला उमेदवारांचा समावेश आहे.
पहिल्या टप्प्यात 90 पैकी 18 मतदारसंघांमध्ये मतदान झालं. नक्षलग्रस्त भागातील आठ जिल्ह्यात मुख्यमंत्री रमणसिंह यांच्यासह 190 उमेदवारांचं भवितव्य मतपेटीत बंद झालं आहे.
रमणसिंह सरकार
छत्तीसगड विधानसभेच्या 90 जागांपैकी 65 हून अधिक जागा जिंकत सलग चौथ्यांदा सरकार स्थापन करण्याचं भाजपचं उद्दिष्ट आहे. रमणसिंह सलग तिसऱ्यांदा सीएमच्या खुर्चीवर विराजमान झाले आहेत. चौथ्यांदा मुख्यमंत्रिपदाची माळ गळ्यात घालण्यास ते उत्सुक आहेत. तर काँग्रेस 15 वर्षांनंतर छत्तीसगडची सत्ता मिळवण्यासाठी प्रयत्नशील आहे.
छत्तीसगडमधील चित्र काय?
छत्तीसगड विधानसभेत 90 आणि लोकसभेच्या 11 जागा आहेत. 2013 सालच्या विधानसभा निवडणुकीत भाजपने 49 आणि काँग्रेसने 39 जागांवर विजय मिळवला होता. तर 2014 सालच्या लोकसभा निवडणुकीत 10 जागा भाजपला आणि काँग्रेसला एक जागा मिळाली होती.