मुंबई : महाराष्ट्रात स्थानिक स्वराज्य संस्थांच्या निवडणुकांच्या पडघड वाजू लागले असतानाच बिहारमध्ये विधानसभा निवडणुकांसाठी उमेदवारांच्या नावांची यादी प्रकाशित होत आहे. भाजपने 243 सदस्य संख्या असलेल्या बिहार विधानसभेच्या निवडणुकांसाठी 71 उमेदवारांची पहिली यादी जाहीर केली. त्यानंतर, नितीशकुमार (Nitishkumar) यांच्या जदयु पक्षाने 57 उमेदवारांची पहिली यादी जाहीर केली आहे. त्यामध्ये, 27 नव्या चेहऱ्यांना संधी देण्यात आली असून 11 उमेदवार हे गत 2020 च्या निवडणुकीत पराभूत झाले होते, त्यांनाही नव्याने तिकीट देण्यात आलं आहे. जदयुच्या पहिल्या उमेदवार यादीत एकही मुस्लिम चेहरा मैदानात उतरवरण्यात आला नसल्याचेही दिसून येत आहे.
बिहार विधानसभा 2025 आता काही दिवसांवर येऊन ठेपली असून भाजप-जदयु युतीकडून उमेदवारांची नावे जाहीर केली जात आहेत. नितीश कुमार यांच्या पक्षाने 57 उमेदवारांची पहिली यादी जाहीर केली आहे. या यादीतून सर्वच जातींना स्थान देण्याचं काम जदयुने केलं आहे. मात्र, पहिल्या यादीत एकही मुस्लिम उमेदवार नाही. तर, 4 महिलांनाही विधानसभेच्या मैदानात उतरवण्यात आलं आहे. जदयुने मधेपुरा येथून कविता साहा, गायघाट येथून कोमल सिंह, समस्तीपूर येथून अश्वमेध देवी, आणि विभूतीपूर येथून रविना कुशवाह या चार महिलांना तिकीट देण्यात आलं आहे. नितीश कुमार यांनी कोईरी आणि कुर्मी समाजाला प्राधान्याने स्थान देत 21 पेक्षा जास्त उमेदवार निवडणुकीच्या रणांगणात उतरवले आहेत. मंत्री विजयकुमार चौधरी यांना पुन्हा एकदा सरायरंजन मतदारसंघातून उमेदवारी दिली आहे. मंत्री श्रवणकुमार यांना नालंदातून आणि मंत्री सुनिलकुमार यांना भोरे येथून निवडणुकीत उतरवले आहे.
जदयुच्या पहिल्या 57 उमेदवारांच्या यादीत 27 नवे चेहरे आहेत. तर, गतवर्षीच्या निवडणुकीत पराभव झालेले 11 उमेदवारही मैदानात आहेत. राज्यातील बाहुबली नेत्यांनाही स्थान देण्यात आलं असून मोकामा येथून अनंतसिंह, एकमातून धुमलसिंह आणि कुचाएकोट मतदारसंघातून अमरेंद्र पांडे यांना तिकीट दिलं आहे. हे तिन्ही नेते आपल्या क्षेत्रात, मतदारसंघात प्रभावशाली आहेत. त्यात, अनंतसिंह यांनी मंगळवारीच आपला उमेदवारी अर्ज दाखल केला आहे. यासह जेदयुच्या पहिल्या यादीत 5 मंत्र्यांना पुन्हा संधी देण्यात आली आहे.
18 आमदारांना पुन्हा संधी
विद्यमान आमदार असलेल्या 18 उमेदवारांना पुन्हा संधी देत जदयुने विधानसभेच्या मैदानात उतरवलं आहे. मात्र, दोन विद्यमान आमदारांचे तिकीट कापण्यात आलं आहे. विशेष म्हणजे चिराग पासवान यांच्याकडून दावा करण्यात येणाऱ्या 5 मतदारसंघात जेदयुने आपले उमेदवार दिले आहेत. त्यामुळे, येथील महागठबंधनमध्ये वाद होऊ शकतो. कारण, सोनबरसा, अलौली, राजगीर, एकमा आणि मोरवा या 5 मतदारसंघातून जदयुचे उमेदवार जाहीर करण्यात आले आहेत.
एकही मुस्लिम उमेदवार नाही
जनता दल युनायटेड पक्षाने 57 उमेदवारांची पहिली यादी जाहीर केली असून यात एकही मुस्लिम उमेदवार नाही. मात्र, 2020 च्या विधानसभा निवडणुकीत पक्षाने 3 मुस्लिम उमेदवारांना संधी दिली होती. डुमरांव मतदारसंघातून अंजुम आरा उमेदवार होते, यंदा तेथून राहुल सिंह यांना तिकीट देण्यात आलं आहे. दरभंगा ग्रामीण मतदारसंघात 2020 मध्ये फराज फातमी उमेदवार होत्या, आता ईश्वर मंडल यांना येथून तिकीट दिलं आहे. तर, कांटी मतदारसंघातून गत निवडणुकीत मोहम्मद जमाल यांस टिकट देण्यात आलं होतं. पण, यंदाच्या निवडणुकीत अजीत कुमार यांना जदयुने मैदानात उतरवलं आहे.
BJP seat sharing: जागावाटपाचा तपशील (Seat Distribution Details)
भाजप (BJP) – 101 जागा
जदयू (JDU) – 101 जागा
लोक जनशक्ती पक्ष (रामविलास) (LJP-Ram Vilas) – 29 जागा
राष्ट्रीय लोक मोर्चा (RALOMO) – 6 जागा
हिंदुस्तानी अवाम मोर्चा (HAM) – 6 जागा
Bihar Vidhansabha Seats Detail : बिहारचे पक्षीय बलाबल 2020
एकूण सदस्यसंख्या (Total Seats) – 243
राष्ट्रीय जनता दल (RJD) – 79
भारतीय जनता पक्ष (BJP) – 78
जनता दल (युनायटेड) – JD(U) – 45
काँग्रेस (Congress) – 19
CPI (Marxist–Leninist) Liberation – 12
हिंदुस्तानी अवाम मोर्चा (HAM-Secular) – 4
CPI – 2
CPI (M) – 2
AIMIM – 1
अपक्ष आमदार (Independent MLA) – 1