उद्धव ठाकरेंच्या अयोध्या दौऱ्याआधीच शिवसेनेला मोठा झटका

"या नेत्यांना रामापेक्षा राजकारणात अधिक रस आहे. या दोन्ही संघटना केवळ प्रचार करण्यासाठी आणि राजकारणासाठी अयोध्यात कार्यक्रम करत आहेत," असा आरोप नरेंद्र गिरी यांनी केला आहे.

अलाहाबाद : उद्धव ठाकरे यांच्या अयोध्या दौऱ्याआधीच शिवसेनेला मोठा झटका बसला आहे. साधू-संतांची सर्वात मोठी संस्था अखिल भारतीय आखाडा परिषदेने शिवसेनेचं आमंत्रण केवळ धुडकावलंच नाही तर उद्धव ठाकरे आणि त्यांच्या पक्षावर राजकीय खेळी केल्याचा गंभीर आरोपही केला आहे. "आखाड्याशी संबंधित साधू-संत शिवसेनेच्याच नाही तर 25 नोव्हेंबर रोजी विश्व हिंदू परिषदेच्या कार्यक्रमातही सहभागी होणार नाहीत," असं आखाडा परिषदेचे अध्यक्ष महंत नरेंद्र गिरी यांनी स्पष्ट केलं.

"या नेत्यांना रामापेक्षा राजकारणात अधिक रस आहे. या दोन्ही संघटना केवळ प्रचार करण्यासाठी आणि राजकारणासाठी अयोध्यात कार्यक्रम करत आहेत," असा आरोप नरेंद्र गिरी यांनी केला आहे. "जर हिंदुत्ववादी संघटना आणि हिंदुत्वादी पक्षांचा मंदिर बनवणं हाच हेतू असेल, तर वेगवेगळ्या कार्यक्रमांचं आयोजन का?" असा प्रश्नही महंत नरेंद्र गिरी यांनी विचारला आहे. "शिवसेना आणि विहिंपच्या कार्यक्रमांमुळे मंदिर बांधण्यासंदर्भात कोणताही तोडगा निघणार नाही," असं महंद नरेंद्र गिरी म्हणाले.

महंत नरेंद्र गिरी यांच्या माहितीनुसार, "शिवसेना आणि विहिंपच्या कार्यक्रमांपासून फारकत घेऊन आखाडा परिषद 4 आणि 5 डिसेंबर रोजी अयोध्येत वेगळी बैठक घेणार आहे. या बैठकीत अयोध्या प्रकरणातील पक्षकार इक्बाल अन्सारी यांसह अनके मुस्लीम धर्मगुरुंना आमंत्रण देण्यात आलं आहे. जर राम मंदिराचे सर्व पक्षकार एकाच व्यासपीठावर आले तर परस्पर सहमतीने काहीतरी तोडगा नक्कीच निघेल."