मुंबई : मस्साजोगचे सरपंच संतोष देशमुख हत्या प्रकरणात एकीकडे वाल्मिक कराडचा पाय खोलात जात असतानाच दुसरीकडे धनंजय मुंडे यांचीही अडचण वाढताना दिसत आहे. भाजपचे आमदार सुरेश धसांनी हे प्रकरण पहिल्या दिवसांपासून लावून धरलं आहे. अशातच सुरेश धसांनी मुख्यमंत्री देवेंद्र फडणवीसांची भेट घेतली आणि त्यानंतर अनेक गौप्यस्फोट केले. यावेळी त्यांनी भाजपच्या मंत्री पंकजा मुंडे यांचेही नाव घेतलं.
बीडमध्ये एका प्रकरणात आरोपीला सोडून देण्यासाठी वाल्मिक कराडने एका महिला पोलिस अधिकाऱ्याला फोन केला होता. त्याची ऑडिओ क्लिप आता व्हायरल होत आहे. वाल्मिक कराडच्या नव्या ऑडिओ क्लिपचा तपास करावा, फोनवरुन बोलणाऱ्या महिला अधिकारी कोण याचा शोध घ्यावा अशी मागणी आमदार सुरेश धस यांनी केली.
पंकजा मुंडेंवर काय म्हणाले?
मुख्यमंत्र्यांची भेट घेऊन आल्यानंतर माध्यमांशी बोलताना सुरेश धस म्हणाले की, "परळीमधील भगवान गडावर झालेल्या दसरा मेळाव्यावेळी बोलताना पंकजा मुंडे म्हणाल्या होत्या की ज्यांच्याशिवाय धनंजय मुंडेंचे पान हालत नाही असे वाल्मिक कराड. आता वाल्मिक कराड आणि महिला अधिकाऱ्यामध्ये जो फोन झाला ते प्रकरण अतिशय गंभीर आहे. आता ते पानसुद्धा धनंजय मुंडेंशिवाय हाललंय की नाही ते मला बघायचं आहे."
एकाच रस्त्यावर पाच पाच वेळा पैसे उचलले
परळी नगरपालिकेच्या कामाचं ऑडिट करावं अशी मागणी सुरेश धस यांनी केली. ते म्हणाले की, परळीतील एकाच रस्त्यावर पाच पाच वेळा पैसे उचलण्यात आले. एकेका व्यक्तीच्या नावावर 46 लाखांची बिलं निघाली. या सर्व प्रकरणांची चौकशी करण्यात यावी.
करुणा मुंडेंच्या कारमध्ये पिस्तुल ठेवणारा पोलिस अद्याप सेवेत
करुणा मुंडे यांच्या कारमध्ये पिस्तुल ठेवणारा साडीतील पोलिस अधिकारी कोण होता याचा शोध घ्यावा. तो पोलिस आजही बीड पोलिस दलात कार्यरत आहे असा आरोप सुरेश धसांनी केला.
बीडमध्ये एकाच ठिकाणी पोलिस 15-20 वर्षे कार्यरत
बी़डमध्ये एक पोलिस अधिकारी हा 15 वर्षांपासून कार्यरत आहे. त्याचे राखेचे 100 टिप्पर आहेत, 15 जेसीबी आहेत आणि त्याची जिल्ह्यातील मटक्यामध्ये भागिदारी आहे. त्याची चौकशी करण्यात यावी. तसेच अनेक पोलिस हे गेल्या 20 वर्षांपासून एकाच ठिकाणी कार्यरत आहेत. त्यांची जिल्ह्याच्या बाहेर बदली करावी. बीडमध्ये बिंदू नामावलीमध्ये घोळ झाला याची माहिती घ्यावी अशी मागणी सुरेश धसांनी केली.
बीडमधील पोलिस दलाची नियुक्ती हीच आकाने केली आहे. त्यामुळे गडचिरोलीचे पालकमंत्री असलेल्या मुख्यमंत्र्यांनी ते सर्व पोलिस दल उचलावं आणि गडचिरोलीला न्यावं अशी मागणी सुरेश धसांनी केली आहे.
राखेचे अवैध साठे जप्त करावेत
महानिर्मिती कंपनी जरी प्रायव्हेट असली तरी त्याचे खासगीकरण शासनाने केले आहे. त्या राखेची किंमत कोट्यवधींची आहे. परळी थर्मलमधील राखेचे अवैध साठे जप्त करण्यात यावेत. ती यादी मी पोलिस अधिकाऱ्यांकडे देणार असून त्यांनी त्यावर कारवाई करावी अशी मागणी सुरेश धसांनी केली.
त्या ऑडिओ क्लिपमधील महिला अधिकारी कोण?
एका गुन्ह्यातील आरोपीला सोडण्यासाठी वाल्मिक कराडने महिला पोलिस अधिकाऱ्याला फोन केला होता. ती महिला अधिकारी कोण आहे याची चौकशी व्हावी. त्या महिला अधिकाऱ्याने स्पीकर ऑन कसा केला, काय चर्चा झाली याची माहिती घ्यावी. तसेच ते प्रकरण गंभीर असून नेमकं काय आहे याचा तपास मीडियाने करावा अशी मागणी सुरेश धसांनी केली.
दोन वर्षांपूर्वी बीडमधील व्यापारी भगिरथ बियानी यांनी आत्महत्या केली होती. त्या प्रकरणाचीही चौकशी करण्यात यावी अशी मागणी सुरेश धसांनी केली आहे.
सौरभ भोंडवे केसमध्ये सुरुवातीला वाल्मिक कराडच्या सांगण्यावरून गुन्हा दाखल करुन घेण्यात आला नव्हता. सौरभ भोंडवेचे वडील आपल्याकडे आले होते. आकाच्या माणसाने त्याची केस दाखल करून घेतली नव्हती. आता मात्र पोलिसांना सांगितल्यानंतर केस दाखल करून घेतली आहे अशी माहिती सुरेश धसांनी दिली.
आका हे बीडचे सुपर पालकमंत्री
सुरेश धस म्हणाले की, "2019 ते 2024 या कालावधीत धनंजंय मुंडे हेच पालकमंत्री होते. तर आका हे सुपर पालकमंत्री होते. ते जिल्ह्याचे बाप समजतात. त्यांनी 11 तालुक्यांना 100 कोटी द्यायचे आणि एकाच तालुक्याला 300 कोटी द्यायचे असं सुरू होतं. आता त्यामध्ये किती पैसे खाल्ले आहेत याची चौकशी करावी. परळी नगरपालिकेचे ऑडिट करण्याची मागणी केली आहे."
पाच हजार कोटींचा पीक विमा भ्रष्टाचार
राज्यात 5000 कोटींचा पीक विमा घोटाळा झाला असल्याचा आरोप सुरेश धस यांनी केला. या प्रकरणाची चौकशी करण्यात यावी अशी मागणी त्यांनी मुख्यमंत्र्यांकडे केली आहे.
ही बातमी वाचा :