मुंबई: बीड - परभणी मार्गावर धावणाऱ्या एसटी बसला घोडका राजुरी येथील स्वराज हॉटेल जवळ झालेल्या भीषण अपघातामध्ये (Accident) 3 तरुण मुलांचा दुर्दैवी मृत्यू झाला. ही घटना अत्यंत वेदनादायक असून मृत्यूमुखी पडलेल्या तरुणांच्या कुटुंबीयांच्या दुःखामध्ये आम्ही सहभागी आहोत. दुर्दैवाने अपघातात मृत्युमुखी पडलेल्या तरुणांची आयुष्य आपण परत आणू शकत नाही, परंतु त्यांच्या कुटुंबीयांवर कोसळलेला दुःखाचा डोंगर पाहता, फुल ना फुलाची पाकळी म्हणून एस.टी. महामंडळाकडून त्यांच्या कुटुंबीयांना 10 लाख रुपयांची मदत देण्याची निर्देश परिवहन मंत्री म्हणून मी एसटी प्रशासनाला दिली आहेत. अशी माहिती परिवहन मंत्री प्रताप सरनाईक (Transport Minister Pratap Sarnaik) यांनी दिली आहे.
बीड- परभणी मार्गावर पहाटे 6 च्या दरम्यान पोलीस भरतीची तयारी करणाऱ्या 3 तरुण मुलांना एसटी बसची धडक बसली. सकाळच्या धुक्यामुळे धावण्याचा सराव करणारी मुले चालकाला दिसली नाहीत, असे चालकाचे म्हणणे आहे. दुर्दैवाने या अपघातामध्ये त्या तीनही मुलांचा मृत्यू झाला. या घटनेमुळे बीड आणि परिसरामध्ये शोककळा पसरली आहे. यावेळी एस.टी. महामंडळाचे उपाध्यक्ष आणि व्यवस्थापकीय संचालक डॉ. माधव कुसेकर, बीडचे आमदार संदीप क्षीरसागर आणि बीडचे माजी शिवसेना जिल्हाप्रमुख कुंडलिक खांडे यांच्याशी चर्चा करून मृत्युमुखी पडलेल्या मुलांच्या नातेवाईकांना एस.टी. तर्फे प्रत्येकी 10 लाखाची मदत देऊ केली आहे. तसेच शासनातर्फे त्यांच्या कुटुंबीयांना जे काय मदत करणे शक्य होईल, ती मदत करण्यास आम्ही तत्पर आहोत. असे आश्वासन यावेळी मंत्री प्रताप सरनाईक यांनी दिले आहेत.
नेमका कसा घडला अपघात?
बीड-परळी महामार्गावरील घोडका राजुरी जवळ एसटी बसने व्यायामासाठी गेलेल्या तीन तरुणांना उडवलं. पोलीस भरतीची तयारी करणाऱ्या या 3 तरुणांचा या घटनेमध्ये दुर्दैवी मृत्यू झाला आहे. हे तरुण नेहमीप्रमाणे आज (रविवारी) देखील सकाळच्या सुमारास व्यायाम करण्यासाठी गेले होते. यावेळी मागून भरधाव वेगात येणाऱ्या एसटी बसने तरुणांना जोरदार धडक दिली. सकाळच्या धुक्यामुळे धावण्याचा सराव करणारी मुले चालकाला दिसली नाहीत, असे चालकाचे म्हणणे आहे.
तर घटनेची माहिती मिळताच या जखमी तरुणांना जिल्हा रुग्णालयात नेण्यात आले. तरुणांच्या नातेवाईकांनी तात्काळ जिल्हा रुग्णालयात धाव घेतली आहे. मात्र उपचारा दरम्यान या 3 तरुण मुलांचा दुर्दैवी मृत्यू झाला आहे.
इतर महत्वाच्या बातम्या