'विखे पाटील म्हणजे महादेवाच्या पिंडीवर बसलेला विंचू'; बड्या नेत्याच्या गंभीर आरोपाने खळबळ

Radhakrishna Vikhe Patil and Sujay Vikhe Patil : आगामी विधानसभा निवडणुकीच्या पार्श्वभूमीवर भाजपमधील अंतर्गत कलह पुन्हा एकदा चव्हाट्यावर आलाय. शिर्डीतील बड्या नेत्याने विखे पाटलांवर गंभीर आरोप केलाय.

शिर्डी : आगामी विधानसभा निवडणुकांच्या (Vidhan Sabha Election 2024) पार्श्वभूमीवर भाजपमधील (BJP) अंतर्गत कलह पुन्हा एकदा चव्हाट्यावर आलाय. शिर्डी विधानसभा मतदारसंघासाठी (Shirdi Vidhan Sabha Constituency) इच्छुक असलेले भाजपचे डॉ. राजेंद्र पिपाडा (Rajendra Pipada) यांनी महसूल मंत्री राधाकृष्ण विखे पाटील (Radhakrishna Vikhe Patil) आणि माजी खासदार सुजय विखे पाटील (Sujay Vikhe Patil) यांच्यावर गंभीर आरोप केले आहेत. 

विखे पाटलांमुळे अहमदनगर (Ahmednagar) जिल्ह्यात भाजपची अधोगती झालीय. विखे पाटील म्हणजे महादेवाच्या पिंडीवर बसलेला विंचू असून या विंचवाला मारायचं असेल तर ती चप्पल महादेवाला लागते, अशी भाजप नेत्यांची अवस्था झाली असल्याचा गंभीर आरोप राजेंद्र पिपाडा यांनी राहाता शहरात झालेल्या पत्रकार परिषदेत केला आहे.

विखे पाटलांविरोधात लढवली होती निवडणूक

भाजपचे नेते डॉ. राजेंद्र पिपाडा यांनी काही दिवसांपूर्वी पत्रकार परिषद घेत विखे पाटलांच्या कार्यशैलीबाबत आक्षेप घेत टीका केली होती. यानंतर त्यांच्याच सांगण्यावरून माझ्यावर हल्ला करण्याचा प्रयत्न झाल्याचा गंभीर आरोप पिपाडा यांनी केलाय. 2009 साली डॉ. राजेंद्र पिपाडा यांनी राधाकृष्ण विखे पाटील यांच्या विरोधात विधानसभेची निवडणूक लढवली होती. अत्यंत चुरशीची ठरलेल्या त्या निवडणुकीत पिपाडा यांचा अवघ्या 13 हजारच्या फरकाने पराभव झाला होता. 

राजेंद्र पिपाडा यांनी विखे पाटील पिता-पुत्रांविरोधात ठोकला शड्डू 

2019 साली काँग्रेसला रामराम करत विखे पाटीलांनी भाजपमध्ये प्रवेश केला होता. पिपाडा आणि विखे पाटील या कट्टर विरोधकांचे मनोमिलन घडवण्यात त्यावेळी देवेंद्र फडणवीस (Devendra Fadnavis) यांना यश आले होते. मात्र, आता पुन्हा पिपाडा यांनी विखे पाटील पिता - पुत्रांविरोधात शड्डू ठोकलाय. विखे पाटील हे भाजपच्या नेत्यांनाच त्रास देत असून ते पक्षात आल्यानंतर पक्षाची अधोगती झाल्याचे पिपाडा यांनी म्हटले आहे. मागील विधानसभा निवडणुकीत विखे पाटील यांच्यामुळे जिल्ह्यात भाजपच्या पाच आमदारांचा पराभव झाला तर या लोकसभा निवडणुकीत (Lok Sabha Election 2024) शिर्डी आणि नगर लोकसभा गमवावी लागल्याचाही गंभीर आरोप पिपाडा यांनी केला आहे. आता पिपाडा यांच्या टीकेवर विखे पाटील नेमकं काय उत्तर देणार? याकडे सर्वांचे लक्ष लागले आहे. 

इतर महत्त्वाच्या बातम्या