Navratri Recipe : नवरात्रोत्सव अवघ्या काही दिवसांवर येऊन ठेपला आहे. कोरोना प्रादुर्भाव कमी झाल्याने दोन वर्षांनी देशभरात ठिक-ठिकाणी मोठ्या जल्लोषात नवरात्रोत्सव (Navratri 2022) साजरा होणार आहे. अनेक मंडळी नवरात्रोत्सवात नऊ दिवस उपवास करत असतात. पण खिचडी, साबुदाण्याचे वडे हे नेहमीचे उपवासाचे पदार्थ खाऊन कंटाळा येतो. तर जाणून घ्या साबुदाण्याचे थालीपीठ बनवण्याची रेसिपी...
'साबुदाण्याचे थालीपीठ' बनवण्यासाठी लागणारे साहित्य -
- उकडलेले बटाटे - 2
- भाजलेला साबुदाणा - 2 वाटी
- भाजलेल्या शेंगदाण्याचे कूट - 1 वाटी
- हिरव्या मिरच्या - 5 ते 6
- तूप किंवा तेल - 1 चमचा
- मीठ - चवीनुसार
'साबुदाण्याचे थालीपीठ' बनवण्याची कृती
- 'साबुदाण्याचे थालीपीठ' बनवण्यासाठी सर्वात आधी उकडलेला बटाटा बारीक खिसावा.
- मिरच्या मिक्सरमध्ये वाटून घ्याव्या.
- भाजलेला साबुदाणा , शेंगदाण्याचे कूट, वाटलेल्या मिरच्या, खिसलेला बटाटा , चवीनुसार मीठ एकत्र करावे.
- तयार झालेल्या मिश्रणात लागेल तसे पाणी घालून पीठ मळून घ्यावे.
- पीठ मळल्यानंतर ते थालीपीठाप्रमाणे थापून घ्यावे.
- एकीकडे गॅसच्या मध्यम आचेवर तवा तापत ठेवावा.
- तवा तापल्यानंतर त्यात तेल किंवा तूप घालावे.
- थापलेले थालीपीठ झाकण ठेऊन मध्यम आचेवर भाजून घ्यावे.
- त्यानंतर पाच मिनिटांनी झाकण काढून थालीपीठ दुसऱ्या बाजूला करावे.
- तयार झालेले थालीपीठ दह्यासोबत चविष्ट लागते.
दूधाचे सेवन करावेत
उपवास करताना अनेकांना थकवा जाणवत असतो. अशावेळी दूधाचे सेवन करावे. दूधात प्रोटिन, कॅल्शियम आणि व्हिटॅमिन बी-2 असते. त्यामुळे उपवासादरम्यान दूध पिणे आरोग्यासाठी फायदेशीर आहे. उपवासाच्या मिसळसोबत गरमागरम दूध प्यायल्यानंतर पोट भरण्यासदेखील मदत होईल. दुधामुळे अनेक समस्यादेखील जाणवत नाहीत.
संबंधित बातम्या