Bigg Boss Marathi : बहुप्रतिक्षित कार्यक्रम बिग बॉस मराठीचा (Bigg Boss Marathi Season 5) पाचवा सिझन येत्या 28 जुलै पासून प्रेक्षकांच्या भेटीला येणार आहे. यंदाच्या या सिझनमध्ये घरातल्या सदस्यांची शाळा घेण्यासाठी रितेश देशमुख (Ritiesh Deshmukh) होस्टच्या खुर्चीत बसणार आहे. त्यामुळे आता या सिझनमध्ये स्पर्धक म्हणून कोण सहभागी होणार याची जोरदार चर्चा रंगू लागली आहे. त्याचसाठी सोशल मीडियावरही विविध शक्यता वर्तवण्यात येत आहे.
काही दिवसांपूर्वीच कोकण हार्टेड गर्ल अंकिता वालावलकर हिच्या नावाची चर्चा होती. त्यातच आता मालिकांमधील दोन अभिनेत्यांची बिग बॉसच्या घरात एन्ट्री होणार असल्याचं म्हटलं जातंय. त्यासाठी सोशल मीडियावर पोस्ट देखील व्हायरल होत आहेत. कलर्स मराठी वाहिनीवरील भाग्य दिले तू मला या मालिकेतील अभिनेता विवेक सांगळे आणि स्टार प्रवाह वाहिनीवरील ठिपक्यांची रांगोळी या मालिकेतील चेतन वडनेरे हे दोन कलाकार झळकण्याची शक्यता आहे.
चेतन आणि विवेक दिसणार बिग बॉसच्या घरात एन्ट्री?
दरम्यान चेतन आणि विवेक या दोघांच्याही मालिका संपून बराच काळ लोटला आहे. त्यातच त्या दोघांचे सध्या कोणते प्रोजेक्ट सुरु आहे, याबाबतही काही माहिती नाही. त्यामुळे हे दोघेही आता बिग बॉसच्या घरात दिसू शकतात. पण अद्याप कोणतीही अधिकृत माहिती समोर आली नाही. परंतु चेतन आणि विवेकला बिग बॉसच्या घरात पाहण्यासाठी त्यांचे चाहते मात्र बरेच उत्सुक आहेत. तसेच हे दोघे घरात जाणार का हे 28 जुलै रोजी कळेलच.
अंकिता वालावलकर बिग बॉसच्या घरात होणार सहभागी?
अंकिता वालावलकर ही सोशल मीडियावर बरीच चर्चेत असते. त्यामुळे बिग बॉसच्या घरात अंकिताची एन्ट्री होऊ शकते. त्याचप्रमाणे सोशल मीडियावरच्या तिच्या काही पोस्टमुळे तिला ट्रोलिंगला देखील सामोरं जावं लागतं. म्हणूनच बिग बॉसच्या घरात येणारी पहिली स्पर्धक ही अंकिता असणार का? अशा चर्चा सध्या जोर धरु लागल्या आहेत. पण अंकिता बिग बॉसच्या घरात येणार की नाही हे येत्या 28 जुलै रोजी स्पष्ट होईल.