Bigg Boss Marathi Season 5 : कलर्स मराठी (Colors Marathi) वाहिनीवर येत्या 28 जुलैपासून बिग बॉस मराठीच्या (Bigg Boss Marathi Season 5) पाचव्या सिझनची सुरुवात होणार आहे. काही दिवसांपूर्वीच पाचव्या सिझनची घोषणा करण्यात आली होती. त्यानंतर प्रेक्षकांमध्ये चांगलीच उत्सुकता निर्माण झाली असल्याचं पाहायला मिळतंय. पण या सिझनमध्ये स्पर्धक म्हणून कोण उपस्थित राहणार ही गोष्ट मात्र अद्यापही गुलदस्त्यातच आहे. त्यातच अनेकांच्या नावाच्या जोरदार चर्चा देखील सुरु झाल्या आहेत.
रितेश देशमुखची एन्ट्री ही या सिझनमधलं पहिलं सरप्राईज होतं. त्यामुळे या सिझनमध्ये बरेच सरप्राईजेस मिळणार असल्याचंही सोशल मीडियावर म्हटलं जात आहे. पण आता एका स्पर्धकाच्या नावाची जोरदार चर्चा सुरु झाली आहे. सोशल मिडिया स्टार ही स्पर्धक असून तिच्या नावाची सोशल मीडियावर जोरदार चर्चा सुरु आहे. ही स्टार दुसरी तिसरी कुणी नसून अंकिता वालावलकर आहे.
अंकिता वालावलकर बिग बॉसच्या घरात होणार सहभागी?
अंकिता वालावलकर ही सोशल मीडियावर बरीच चर्चेत असते. त्यामुळे बिग बॉसच्या घरात अंकिताची एन्ट्री होऊ शकते. त्याचप्रमाणे सोशल मीडियावरच्या तिच्या काही पोस्टमुळे तिला ट्रोलिंगला देखील सामोरं जावं लागतं. म्हणूनच बिग बॉसच्या घरात येणारी पहिली स्पर्धक ही अंकिता असणार का? अशा चर्चा सध्या जोर धरु लागल्या आहेत. पण अंकिता बिग बॉसच्या घरात येणार की नाही हे येत्या 28 जुलै रोजी स्पष्ट होईल.
प्रत्येक आठवड्यात झटका आणि मनोरंजनाचा धमाका
मराठी मनोरंजनाचा बाप... ज्याची वाट अख्खा महाराष्ट्र बघतो... सुरु व्हायच्या आधीच ज्याच्या बद्दलच्या चर्चेला उधाण येतं, असा आपल्या सगळ्यांचा आवडता कार्यक्रम 'बिग बॉस मराठी' अवघ्या काही दिवसांत सुरू होत आहे. तारीख जाहीर झाल्याने यंदा कोणते स्पर्धक 'बिग बॉस मराठी'च्या घरात धूम करणार याकडे सर्वांचंच लक्ष लागलंय. ‘बिग बॉस मराठी'चं बिगुल आता वाजणार आणि स्पर्धकांच्या करामतींचा आता कस लागणार! प्रत्येक आठवड्यात लागेल झटका, आणि रंगणार मनोरंजनाचा धमाका. अशक्य अशा गोष्टींनी बनलेला 'बिग बॉस मराठी'चा नवा सीझन प्रेक्षकांच्या भेटीसाठी आता सज्ज आहे. घरातील मजा, मस्ती, डाव , प्रतिडाव आणि नव्या होस्टची कमाल अशा साऱ्याच गोष्टी पाहण्याची , अनुभवण्याची प्रेक्षकांना उत्सुकता आहे.