The Raja Saab Review: प्रभासची बहुप्रतीक्षित आगामी फिल्म ‘द राजा साब’ लवकरच प्रेक्षकांच्या भेटीला येणार असून चित्रपटाचा पहिला रिव्ह्यू आता समोर आला आहे. तरुण दिग्दर्शक मारुती यांच्या दिग्दर्शनाखाली तयार झालेला हा हॉरर-एंटरटेनर 9 जानेवारी 2026 रोजी संक्रांतीच्या मुहूर्तावर चित्रपटगृहांमध्ये प्रदर्शित होणार आहे. या चित्रपटात प्रभास आजवर कधीही न पाहिलेल्या हटके अंदाजात दिसणार असल्याने चाहत्यांमध्ये मोठी उत्सुकता आहे.
मास ऑडियन्ससाठी परिपूर्ण एंटरटेनिंग
चित्रपट समीक्षक उमैर संधू यांनी त्यांच्या इंस्टाग्राम स्टोरीद्वारे ‘द राजा साब’चा फर्स्ट रिव्ह्यू शेअर केला आहे. त्यांच्या मते, हा चित्रपट मास ऑडियन्ससाठी परिपूर्ण एंटरटेनर आहे. प्रभासने आपल्या अभिनयाने पुन्हा एकदा प्रेक्षकांची मने जिंकली असल्याचे त्यांनी म्हटले आहे. विशेष उल्लेख करत त्यांनी संजय दत्त यांना ‘सरप्राइज पॅकेज’ म्हटलंय. प्रभास आणि संजय दत्त यांच्यातील क्लॅश सीन जबरदस्त असल्याचेही त्यांनी सांगितलेय. विशेषतः चित्रपटाचा प्री-क्लायमॅक्स आणि क्लायमॅक्स भाग अत्यंत दमदार असल्याचे त्यांनी म्हटलंय. व्हिज्युअल इफेक्ट्स आणि दिग्दर्शनालाही त्यांनी चांगली दाद दिली असून चित्रपटाला 5 पैकी 3.5 स्टार दिले आहेत.
सेन्सॉर बोर्डाचा ग्रीन सिग्नल
दरम्यान, ‘द राजा साब’ने सेन्सॉर बोर्डाच्या सर्व औपचारिक प्रक्रिया पूर्ण केल्या आहेत. वृत्तांनुसार, केंद्रीय फिल्म प्रमाणन मंडळाने चित्रपट पाहून समाधान व्यक्त केले असून त्याला यूए (16+) प्रमाणपत्र दिले आहे. काही दृश्ये आणि संवादांमध्ये किरकोळ बदल सुचवण्यात आले होते, जे निर्मात्यांनी तात्काळ लागू केल्यानंतर चित्रपटाला मंजुरी देण्यात आली.
भव्य सेट्स, प्रभावी VFX
सुमारे 3 तास 10 मिनिटे म्हणजे सुमारे 190 मिनिटे लांबीचा हा चित्रपट प्रेक्षकांना सुरुवातीपासून शेवटपर्यंत खिळवून ठेवेल, असा विश्वास निर्मात्यांचा आहे. प्री-क्लायमॅक्स आणि क्लायमॅक्स मिळून जवळपास 45 मिनिटांचा दमदार शेवटचा भाग चित्रपटाची खासियत ठरणार आहे. भव्य सेट्स आणि प्रभावी VFX मुळे चित्रपटाला ग्रँड आणि रहस्यमय वातावरण मिळाले आहे.
काय आहे कथानक?
कथानक राजासाब या पात्राभोवती फिरते, ज्याची भूमिका प्रभासने साकारली आहे. राजघराण्यात जन्मलेला राजासाब आर्थिक अडचणींमुळे साधं आयुष्य जगतो. तो आपल्या आजी गंगादेवी (गंगाव्वा) यांच्यासोबत राहतो. खानदानी, रहस्यमय महालात प्रवेश केल्यानंतर सुरू होणाऱ्या घटनांभोवती कथा गुंफली आहे. हरवलेली मालमत्ता, आजोबांचा विश्वास आणि कुटुंबातील भावनिक नातेसंबंध हे चित्रपटाचे महत्त्वाचे पैलू आहेत.चित्रपटात मालविका मोहनन, निधी अग्रवाल, रिद्धी कुमार, बोमन ईरानी यांच्याही महत्त्वाच्या भूमिका असून ‘द राजा साब’ प्रभासच्या करिअरमधील एक वेगळा आणि धाडसी प्रयोग ठरण्याची शक्यता आहे.