Mann Udu Udu Zhaal : ‘झी मराठी’ वाहिनीवरील ‘मन उडू उडू झालं’ (Man Udu Udu Zhaal) ही मालिका अल्पावधीतच प्रेक्षकांच्या पसंतीस उतरली होती. प्रेक्षकांनी या मालिकेला अक्षरशः डोक्यावर उचलून घेतले होते. प्रेक्षकांच्या या लाडक्या मालिकेने काल (13 ऑगस्ट) प्रेक्षकांचा निरोप घेतला आहे. नुकताच या मालिकेचा शेवटचा भाग प्रदर्शित झाला आहे. शनिवारी मालिकेचा शेवटचा भाग प्रेक्षकांच्या भेटीला आला होता. या कथेचा गोड शेवट पाहण्यासाठी प्रेक्षकही आतुर झाले होते.
‘मन उडू उडू झालं’ या मालिकेने प्रेक्षकांच्या मनावर अधिराज्य गाजवलं. या मालिकेतील इंद्रदीप आणि दीपिका अर्थात इंद्रा-दीपूची जोडी प्रेक्षकांच्या पसंतीस उतरली होती. काही दिवसांपूर्वीच या मालिकेचा शेवटचा भाग चित्रित करण्यात आला होता. यानंतर नुकताच हा भाग प्रदर्शित करण्यात आला आहे.
पाहा प्रोमो :
इंद्रा-दीपूच्या प्रेमकथेने जिंकलं मन
मालिकेच्या सुरुवातीपासूनच या मालिकेचं कथानक प्रेक्षकांच्या पसंतीस उतरलं होते. बँकेत काम करणारी दीपिका आणि त्याच बँकेत वसुलीचं काम पाहणारा इंद्रा यांच्यातील ही प्रेमकथा प्रेक्षकांच्या मनाला भावली होती. अनेक आव्हानांचा सामना करत, नकार पचवत त्यांनी आपल्या प्रेमाला यशस्वी केलं. मालिकेच्या शेवटच्या टप्प्यात सगळ्यांचा विरोध मावळून अखेर देशपांडे सरांनी इंद्रा आणि दिपूचं लग्न लावून दिलं. मालिकेत प्रेक्षकांना इंद्रा आणि दीपूचा लग्नसोहळा पाहायला मिळाला होता.
'मन उडू उडू झालं' ही मालिका तरुणांच्या पसंतीस उतरली होती. मालिकेत अभिनेत्री हृता दुर्गुळे (Hruta Durgule) हिने दीपूची भूमिका साकारली होती. तर, अभिनेता अजिंक्य राऊत (Ajinkya Raut) याने इंद्राचे पात्र साकारले आहे. इंद्रा आणि दीपूची जोडी प्रेक्षकांच्या पसंतीस पडली होती. या दोघांचा चाहतावर्गदेखील मोठा आहे.
'मन उडू उडू झालं'ची जागा घेणार ‘ही’ मालिका
'मन उडू उडू झालं' या मालिकेने प्रेक्षकांचा निरोप घेतला असून, आता या मालिकेच्या जागी 'तू चाल पुढं' ही मालिका सुरू होणार आहे. ही मालिका 15 ऑगस्टपासून प्रेक्षकांच्या भेटीला येणार आहे. या मालिकेत अभिनेत्री दीपा परब प्रमुख भूमिकेत दिसणार आहे. गृहिणीच्या आयुष्यावर भाष्य करणारी ही मालिका असून या मालिकेच्या माध्यमातून दीपा परब छोट्या पडद्यावर पुनरागमन करणार आहे.
'तू चाल पुढं' या मालिकेची गोष्ट आहे एका गृहिणीने पाहिलेल्या मोठ्या स्वप्नांची. एकत्र कुटुंब असलेल्या या घरी अश्विनीला देखील त्यांच्या नवीन घरासाठी खारीचा वाटा देण्याची इच्छा असते, हे या प्रोमो मधून झळकते. या मालिकेत अभिनेत्री दीपा परब सोबतच ‘तुझ्यात जीव रंगला’मधील वाहिनीसाहेब म्हणजेच अभिनेत्री धनश्री काडगावकर देखील महत्त्वाची भूमिका साकारताना दिसतेय. ‘तू चाल पुढं’ ही मालिका येत्या 15 ऑगस्टपासून संध्याकाळी 7.30 वाजता प्रेक्षकांच्या भेटीस येणार आहे.
संबंधित बातम्या