Taarak Mehta Ka Ooltah Chashmah Sodhi Missing : छोट्या पडद्यावरील लोकप्रिय मालिका 'तारक मेहता का उलटा चष्मा' (Taarak Mehta Ka Ooltah Chashmah) या मालिकेतील 'रोशन सिंह सोढी'ची भूमिका साकारणारे अभिनेते गुरुचरण सिंह (Gurucharan Singh) मागील चार दिवसांपासून बेपत्ता आहेत. आता या प्रकरणातील महत्त्वाची अपडेट समोर आली आहे. निर्माते जेडी मजीठिया यांनी सांगितले की, आपल्याला भक्ती सोनी यांनी फोन करून गुरुचरण चार दिवसांपासून बेपत्ता असल्याची माहिती दिली होती. त्याशिवाय गुरुचरण सिंह यांनी शेवटचा मेसेज कोणाला केला, याबद्दलही मजीठिया यांनी महत्त्वाची माहिती दिली.
गुरुचरण सिंह यांनी शेवटचा मेसेज कोणाला केलेला?
गुरुचरण सिंह हे 22 एप्रिल रोजी दिल्लीहून मुंबईला येण्यासाठी घरातून निघाले होते. दिल्ली विमानतळावरून त्यांचे मुंबईकरीता विमान होते. मात्र, गुरुचरण सिंह हे मुंबईला पोहचलेच नाही. इतकंच नाही तर ते दिल्लीतील आपल्या घरीदेखील परतले नाही. विमानतळावर अधिक माहिती घेतली असता गुरुचरण सिंह हे विमानात बसलेच नसल्याचे सांगण्यात आले. मात्र, चक्रावून सोडणारी गोष्ट म्हणजे विमानात बसण्याआधी गुरुचरण सिंह यांनी आपण विमानात बसत असल्याचे सांगितले. मग, आता गुरुचरण सिंह नेमके गेले कुठं असा प्रश्न निर्माण झाला आहे.
पोलिसांकडून अपहरणाचा गुन्हा दाखल...
दिल्ली पोलिसांनी या प्रकरणात आता अपहरणाचा गुन्हा दाखल करून तपास सुरू केला आहे. सुरुवातीला मिळालेल्या माहितीनुसार, पोलिसांनी या प्रकरणी हरवले असल्याची तक्रार दाखल केली होती. गुरुचरण सिंह यांचे वृद्ध आई-वडील सातत्याने त्यांचा शोध घेत होते. मात्र, अखेर त्यांनी आपला मुलगा बेपत्ता झाला असल्याची तक्रार पोलिसांत दिली.
गुरुचरण बाबत माहिती मिळाल्यानंतर काय केले?
निर्माते जेडी मजीठिया यांनी सांगितले की, गुरुचरण सिंह हे बेपत्ता असल्याची माहिती मिळाल्यानंतर तातडीने ही माहिती आपल्या मित्रपरिवारांना दिली. जेणेकरून त्यांच्याबद्दल काही मिळेल. त्याशिवाय, 'तारक मेहता का उलटा चष्मा' या मालिकेचे निर्माते आणि जेठालालची भूमिका साकारणारे अभिनेते दिलीप जोशी यांनादेखील ही माहिती कळवण्यात आली. गुरुचरण सिंह यांची मानसिक स्थिती चांगली असल्याचेही मजीठिया यांनी एका प्रश्नाला उत्तर देताना सांगितले.