मुंबई : बिग बॉस-13 ची वाट पाहणाऱ्या प्रेक्षकांसाठी खुशखबर आहे. सलमान खानचा बिग बॉसचा 13 वा सीजन या महिन्याच्या 29 तारखेला लॉन्च होत आहे. लॉन्चच्या दिवसापासून दररोज 10.30 वाजता कलर्स टीव्हीवर हा शो प्रसारित होणार आहे.
कलर्स टीव्हीने आपल्या ट्विटर हॅन्डलवरून सलमान खानचा एक व्हिडीओ ट्वीट केला आहे आणि सोबत बिग बॉस 13 कधी सुरु होणार आहे याची तारीख आणि वेळ याची माहिती दिली आहे. "बिग बॉस 13 मॅड मनोरंजन करण्यासाठी आला आहे. सलमान खानसोबत बघायला विसरु नका, फर्स्ट डे फर्स्ट शो. 29 डिसेंबर रात्री 9 वाजता आणि सोमवार ते शुक्रवार रात्री 10.30 वाजता", असं ट्वीट कलर्स टीव्हीने केलं आहे.
कलर्स टीव्हीने एक प्रोमो देखील शेअर केला आहे, ज्यामध्ये सलमान खान शेफच्या रुपात दिसत आहे. सलमान व्हिडीओत खिचडी बनवताना दिसत आहे. यावेळी सेलिब्रिटी स्पर्धकांच्या एन्ट्रीविषयी चर्चा आहे, शिवाय यावेळी बिग बॉसचा आवाज एका महिलेचा असणार असल्याचीही चर्चा आहे. आजवर बिग बॉसच्या आवाजाची नेहमीच चर्चा होती. अतुल कपूर यांचा हा आवाज आहे. मात्र यावेळी एक महिला देखील अतुल यांच्यासोबत बिग बॉसला आवाज देणार असल्याचं बोललं जात आहे. ती कोण असेल, हे मात्र अद्याप गुलदस्त्यात आहे
बिग बॉस 13 सीजनमध्ये अनेक बदल करण्यात येणार असल्याचंही समोर येत आहे. बिग बॉसच्या 13 व्या सीजनची लोकप्रियता वाढावी यासाठी फक्त सेलिब्रिटीच बिग बॉसच्या घरातील सदस्य असणार आहेत. तर यावेळची बिग बॉसची हॉरर थीम असणार आहे, अशी माहिती समोर येत आहे. मात्र घरातील सदस्य नेमके कोण असतील आणि शोमध्ये काय बदल करण्यात आले आहेत, हे येत्या 29 तारखेला स्पष्ट होईल.