Rang Maza Vegla : 'रंग माझा वेगळा' (Rang Maza Vegla) ही छोट्या पडद्यावरील लोकप्रिय मालिका आहे. गेल्या काही वर्षांपासून ही मालिका प्रेक्षकांचं मनोरंजन करत आहे. टीआरपीच्या शर्यतीतदेखील या मालिकेने बाजी मारली आहे. पण आता ही मालिका प्रेक्षकांचा निरोप घेणार आहे. 'रंग माझा वेगळा' या मालिकेचा मोठा चाहतावर्ग आहे. मालिका बंद होणार असल्याने प्रेक्षक नाराज झाले आहेत.
'रंग माझा वेगळा' या मालिकेत दीपा आणि कार्तिकची लव्हस्टोरी दाखवण्यात आली आहे. गेल्या तीन वर्षांपासून ही मालिका प्रेक्षकांचं मनोरंजन करत आहे. कार्तिक आणि दीपाने आपल्या अभिनयाने प्रेक्षकांच्या मनावर अधिराज्य गाजवलं आहे. 22 जुलैला या मालिकेचं शेवटचं चित्रीकरण पार पडलं आहे.
'रंग माझा वेगळा' या मालिकेचा शेवट कसा असेल?
'रंग माझा वेगळा' या मालिकेत काही दिवसांपासून कार्तिक दीपाचा सूड उगवताना दिसत आहे. दीपाला त्रास देण्यासाठी आयशादेखील त्याला मदत करते. पण आता आयशाची स्मृती परत येण्यासाठी कार्तिक आणि दीपा खास प्लॅन करणार आहेत. मालिकेच्या आगामी भागात आयशाची स्मृती परत येणार असून ती तिची चूक मान्य करणार आहे. त्यानंतर आता कार्तिक आणि दीपाच्या सुखी संसाराला सुरुवात होणार आहे.
'रंग माझा वेगळा' मालिकेत आलेला लीप
'रंग माझा वेगळा' या मालिकेत काही दिवसांपूर्वी 14 वर्षांचा लीप आला होता. कार्तिकला साक्षीच्या मृत्यू प्रकरणी जबाबदार ठरवत 14 वर्षांच्या कारावासाची शिक्षा ठोठावण्यात आली. संपूर्ण कुटुंबासाठी हा मोठा धक्का होता. न्यायालयाच्या निर्णयासमोर दीपाही हतबल झाली. काही दिवसांपूर्वीच दोघांमधील गैरसमज दूर होऊन त्यांनी आपल्या नात्याची नवी सुरुवात केली होती. मात्र दीपा-कार्तिकचा आनंद नियतीला मान्य नव्हता. त्यामुळे पुन्हा एकदा दोघंही एकमेकांपासून दुरावले. दुराव्याच्या याच वळणावर मालिकेचं कथानकही 14 वर्षांनी पुढे सरकलं.
'रंग माझा वेगळा' मालिकेची जागा घेणार 'ही' मालिका
'रंग माझा वेगळा' या मालिकेची जागा आता तेजश्री प्रधानची 'प्रेमाची गोष्ट' ही मालिका घेणार आहे. या मालिकेचा प्रोमो आऊट झाला असून प्रेक्षकांची मालिकेबद्दलची उत्सुकता आणखी वाढली आहे.'प्रेमाची गोष्ट' या मालिकेत मुक्ता आणि सागरच्या प्रेमाची गोष्ट मालिकाप्रेमींना पाहायला मिळणार आहे. मुक्ताच्या भूमिकेत तेजश्री प्रधान तर सागरच्या भूमिकेत राज हंचनाळे दिसणार आहे.
संबंधित बातम्या