Phulala Sugandha Maticha Serial : स्टार प्रवाहवरील फुलाला सुगंध मातीचा ही सर्वाधिक लोकप्रिय मालिका आहे. या मालिकेतील कीर्ती आणि शुभम म्हणजेच समृद्धी केळकर आणि हर्षद अटकरीने प्रेक्षकांच्या मनावर अधिराज्य गाजवले आहे. मालिकेच्या सुरूवातीपासूनच मालिकेत वेगवेगळी वळणे येत आहेत. एका शहरी मुलीचे काही कारणास्तव तिचे इच्छा नसताना ग्रामीण भागातील मुलासोबत लग्न होते. अशा पद्धतीचे वळणे घेत मालिकेच्या कथानकाला सुरूवात झाली होती. आता पुन्हा एकदा 'फुलाला सुगंध मातीचा' या मालिकेचे कथानक अतिशय उत्कंठावर्धक वळणावर येऊन पोहोचले आहे.
"फुलाला सुगंध मातीचा" मालिकेत लवकरच परमेश्वर स्वरुप स्वामीजी यांची एन्ट्री झाली आहे. ही स्वामीजींची भूमिका सुप्रसिद्ध अभिनेते गिरिश ओक साकारणार आहेत. गिरिश ओक पहिल्यांदाच अश्या पद्धतीची व्यक्तिरेखा साकारणार आहेत. याआधी गिरिश ओक छोट्या पडद्यावरील "अग्गबाई सासूबाई" आणि "अग्गबाई सूनबाई" या मालिकेतून प्रेक्षकांच्या भेटीला आले होते. त्या मालिकेत त्यांनी साकारलेल्या "अभिजीत" या पात्रावर प्रेक्षकांनी
भरभरून प्रेम केले होते.
स्वामीजींच्या भूमिकेविषयी गिरीश ओक म्हणाले, "मी याआधी अशा पद्धतीची पात्र रंगवलेली नाहीत. त्यामुळेच आता करताना मजा येत आहे. मला प्रत्यक्षात वेगळी असणारी पात्र साकारायला आवडतात. याआधी मी बरीच सात्वीक पात्र साकारलेली आहेत. त्यामुळे "फुलाला सुगंध मातीचा" मालिकेत स्वामीजी साकारणं माझ्यासाठी नवं आव्हान असणार आहे. कोणतेही पात्र साकारताना त्याची लकब ही प्रेक्षकांच्या मनात कायम राहते. तसेच त्याला लोकप्रियतादेखील मिळते. मी हे पात्र साकारताना नवी लकब शोधून काढली आहे. प्रेक्षकांना हे पात्र आवडेल अशी आशा आहे. मी दिग्गज अभिनेते प्राण यांचा चाहता आहे. भूमिका रंगवताना ते त्या पात्राची प्रेक्षकांवर छाप सोडायचे. त्यामुळे नवी व्यक्तिरेखा साकारताना मी त्यांना डोळ्यासमोर ठेवतो.
स्वामीजींच्या येण्याने कीर्तीसमोर मात्र नवं संकट उभं ठाकणार आहे. आता त्या संकटाचा सामना ती कशी करणार हे "फुलाला सुगंध मातीचा" मालिकेत पाहायला मिळणार आहे. ही मालिका सोमवार ते शनिवार रात्री 8:30 वाजता प्रेक्षकांना स्टार प्रवाहवर पाहता येणार आहे