Bigg Boss Marathi 3 : बिग बॉस मराठीच्या तिसऱ्या पर्वातील स्नेहा वाघ आणि आविष्कार दारव्हेकर हा कार्यक्रम संपल्यानंतर पुन्हा एकत्र येऊ शकतात अशी चर्चा वर्तवली जात आहे. हे दोन सदस्य कधीकाळी पती-पत्नी होते. पण आता त्यांच्यात घटस्फोट झालेला आहे. आजच्या भागात स्नेहा आणि आविष्कार इमोशनल होऊन एकमेकांना मिठीत घेऊन रडताना दिसून येणार आहेत.
"काटा रुते कुणाला" या मालिकेतून स्नेहाने प्रेक्षकांची मनं जिकंली होती. तर आविष्कार अनेक चित्रपटांत दमदार भूमिका स्विकारताना दिसला होता. बिग बॉस मराठीचा तिसरा सीझन सुरू झाल्यापासूनच स्नेहा वाघ आणि आविष्कार दारव्हेकरची जोडी सोशल मीडियावर चांगलीच चर्चेत आहे. बिग बॉसच्या मराठीच्या तिसऱ्या पर्वातील एका भागात आविष्कार त्याच्या वैवाहिक आयुष्याबद्दल खुलेपणाने व्यक्त होताना दिसला होता. त्यात आविष्कार जय दुधाणेसोबत बोलत होता, "स्नेहाने माझ्यावर बरेच आरोप केले होते. तिने माझ्यावर घरगुती हिंसाचाराचे आरोप केले होते". स्नेहाने मुकाट्याने सगळं सहन करण्याऐवजी तिच्यावर होणाऱ्या अन्यायाविरुद्ध आवाज उठवला. त्यामुळे आविष्कार आणि स्नेहामध्ये घटस्फोट झाला होता.
आता बिग बॉसच्या घरात आल्यापासून स्नेहा पुन्हा एकदा चर्चेत आली आहे. स्नेहाने 19 व्या वर्षी आविष्कारसोबत लग्नगाठ बांधली होती. पण घटस्फोटानंतर बिग बॉसच्या घरात दोघेही अचानक आमनेसामने आल्याने आता पुन्हा एकदा ते नातं पुढे घेऊन जाण्याचा विचार करू शकतात अशी शक्यता चाहत्यांकडून वर्तवली जात आहे. बिग बॉसच्या घरात स्नेहा आविष्कारला पाहून अस्वस्थ दिसली होती.
बिग बॉसच्या एका भागात आविष्कारने एक सुंदर कविता ऐकवली होती. त्या कवितेवर स्नेहाने दिलेला प्रतिसाद पाहण्यासारखा होता. कलर्स मराठी वाहिनीने ती क्लिप सोशल मीडियावरदेखील शेअर केली होती. त्यावर कॅप्शन
लिहिले होते, "आविष्कार कवितेतून घालू पाहतोय साद, पण त्याच्या कवितेला कोणाची हवी आहे दाद". आविष्कार जय दुधाने सोबत संवाद साधताना म्हणत होता, घटस्फोटानंतर मी व्यसनाधीन झालो. मी त्यावेळी अक्षरश: कबीर सिंग झालो होतो". स्नेहा आणि आविष्कार बिग बॉसच्या घरातून बाहेर पडताना एकत्र येणार असल्याची शक्यता चाहत्यांकडून वर्तवली जात आहे.