Subodh Bhave: मराठी मनोरंजनविश्वात अभिनय, दिग्दर्शन आणि निर्मिती अशा तिन्ही क्षेत्रांत स्वतःची वेगळी ओळख निर्माण करणारा कलाकार म्हणजे सुबोध भावे. सध्या तो झी मराठीवरील लोकप्रिय मालिका ‘वीण दोघांतली ही तुटेना’ मध्ये समरच्या भूमिकेत झळकत असून, त्याच्या अभिनयाने प्रेक्षकांची मने जिंकली आहेत. सुबोधने त्याच्या सोशल मिडियावर एक पोस्ट केलीय.यात सुबोधने आपल्या अभिनय कारकिर्दीतील एक विशेष टप्पा गाठल्याचे सांगत एक पोस्ट केलीय. हा टप्पा म्हणजे मनोरंजन क्षेत्रातील त्याचा 25 वर्षांचा प्रवास! (Subodh Bhave 25 years)
नाटक, मालिका, वेब सीरिज, चित्रपट या सर्व माध्यमांमधून सुबोध भावेने गेल्या दोन दशकांहून अधिक काळ प्रेक्षकांचे मनोरंजन केले आहे. मग ती ऐतिहासिक व्यक्तिरेखा असो, भावनिक कथानक असो किंवा सामाजिक विषयांवर आधारित भूमिका प्रत्येक वेळी त्याने आपल्या अभिनय कौशल्याने प्रेक्षकांना खिळवून ठेवलं आहे. या यशस्वी प्रवासानंतर सुबोधने आपल्या मनातील भावना सोशल मीडियावर व्यक्त केल्या आहेत. आपल्या फेसबुक पोस्टमधून त्याने या 25 वर्षांच्या प्रवासातील आठवणींना उजाळा दिला आणि आपल्या प्रेक्षकांसह सहकाऱ्यांचे मनापासून आभार मानले. सुबोधने म्हटलं आहे की, या प्रवासात त्याला अनेक दिग्दर्शक, लेखक आणि सहकलाकारांकडून शिकण्याची संधी मिळाली, आणि प्रेक्षकांनी नेहमीच त्याच्यावर प्रेमाचा वर्षाव केला.
काय म्हणाला सुबोध भावे? Subodh Bhave
आपल्या प्रवासाविषयी कृतज्ञता व्यक्त करताना सुबोध म्हणाला. "2000 साली नोव्हेंबर महिन्यात स्मिता तळवलकर यांची निर्मिती आणि संजय सूरकर यांचे दिग्दर्शन असलेल्या तेव्हाच्या "अल्फा टीव्ही मराठी " वरील "पेशवाई " या मालिकेत पहिल्या बाजीराव पेशवे यांची भूमिका मला मिळाली. व्यावसायिक अभिनेता म्हणून हे माझं पहिलं काम. त्या आधी 2 महिने अल्फा टीव्ही वरील गीतरामायण या मालिकेत प्रभू श्री राम यांची भूमिका केली होती पण गाण्यामध्ये संगीताच्या तुकड्यांवर प्रसंगानुरूप काही क्षणांचे चित्रीकरण असे त्याचे स्वरूप होते.
बाजीराव पेशवे यांची भूमिका ही खऱ्या अर्थाने पहिली व्यावसायिक भूमिका.त्यानंतर गेली 25 वर्षे वेगवेगळया व्यक्तिरेखांच्या माध्यमातून रसिक प्रेक्षकांसमोर येत राहिलो.अभिनेता, दिग्दर्शक, निर्माता म्हणून स्वतः ला तपासत राहिलो.10 te 15 व्यावसायिक नाटक, 35 एक मालिका, मराठी आणि हिंदी वेब मालिका,जाहिराती,आणि मराठी, हिंदी, बंगाली, मल्याळम अशा भाषेतले मिळून याच वर्षी पूर्ण झालेले 100 चित्रपट. या प्रवासात विश्वास ठेऊन वेगवेगळ्या भूमिका माझ्या वाट्याला आणणारे माझे सर्व निर्माते, लेखक, दिग्दर्शक यांना मनापासून वंदन. त्याचबरोबर मराठी वाहिन्या, माझे सर्व पडद्यावरचे व पडद्यामागचे सहकलाकार यांचे आभार. ज्यांच्यामुळे मी खूप गोष्टी शिकू शकलो आणि शिकतोय.आणि ज्यांच्यासाठी हा सगळा कलेचा सोहोळा साजरा होतोय त्या सर्व रसिक प्रेक्षकांचे मनापासून आभार. तुम्हा सर्वांचे आशीर्वाद आणि प्रेम कायम राहूद्या.25 वर्षांचा एक छोटा टप्पा पार करतोय.अजून हजारो व्यक्तिरेखा वाट पहातायत .पुढचा टप्पा अजून जास्तं रंजक असेल.मनःपूर्वक धन्यवाद आणि प्रेम.
सुबोधचं लक्षात राहिलेलं काम
सुबोधच्या या पोस्टनंतर सोशल मीडियावर शुभेच्छांचा वर्षाव होत आहे. चाहत्यांनी त्याच्या कामाचं कौतुक करत “अजून अनेक भूमिका तुझ्याकडून पाहायच्या आहेत” अशी प्रतिक्रिया दिली आहे. सुबोध भावेने आपल्या अभिनयातून कट्यार काळजात घुसली, बालगंधर्व, लोकमान्य, तुकाराम यांसारखे अनेक गाजलेले चित्रपट प्रेक्षकांसमोर आणले. तसेच नाटक आणि मालिकांमधूनही त्याने प्रेक्षकांची मने जिंकली आहेत.