Secrets of Gavaskar : ओटीटी हेच भविष्य आहे असे म्हणणाऱ्या सिनेविश्वात ओटीटीचा जाळ भलताच पसरला आहे. बरेचसे मालिका विश्वातील कलाकार ही ओटीटीविश्वात काम करण्यास सज्ज झाले आहेत. क्राईम, रोमान्स, ऍक्शन, वजनदार कथानक, आणि उत्कृष्ट कलाकार यांची सांगड घालत ओटीटी विश्वावर राज्य करण्यासाठी क्राईम आणि थ्रिलरचं कॉकटेल घेऊन 'सिक्रेट ऑफ गावस्कर' (Secrets of Gavaskar) ही नवीकोरी वेब सीरिज तगड्या स्टारकास्टसह प्रेक्षकांसमोर येण्यास सज्ज होत आहे. 'चंद्रा फिल्म एंटरटेनमेंट' निर्मित आणि 'व्हीमास मराठी' प्रस्तुत दिग्दर्शक तेजस लोखंडे दिग्दर्शित ही क्राईम आणि ऍक्शनचा भरणा असलेली वेब सीरिज लवकरच 'व्हीमास मराठी' या प्लॅटफॉर्मवर प्रेक्षकांच्या भेटीस येणार आहे.
या आधी व्हीमास मराठीच्या 'राडा राडा' या टॉक शोमधून प्राजक्ता माळी आणि पूर्वा शिंदे झळकल्या होत्या. त्यांच्या या टॉक शोला प्रेक्षकांची चांगलीच पसंती मिळाली. आता त्यांची 'सिक्रेट ऑफ गावस्कर' ही वेब सीरिज रसिक प्रेक्षकांच्या मनावर राज्य करायला येत आहे. नुकताच या वेब सीरिजचा भयावह ट्रेलर प्रेक्षकांच्या भेटीस आला आहे.
मातब्बर कलाकारांची फौज
अभिनेता हरीश दुधाडे, संग्राम समेळ, मयूर पवार, रमेश चांदणे, अभिनेत्री ज्ञानदा रामतीर्थकर, दीप्ती लेले, शिल्पा नवलकर, मीरा सारंग, सीमा कुलकर्णी, लतिका सावंत, राधा धरणे या तगड्या स्टारकास्टच्या दमदार भूमिका या वेब सीरिजमध्ये पाहायला मिळणार आहेत. प्रत्येक कलाकाराच्या अभिनयाची जादू या वेब सीरिजमधून प्रेक्षकांच्या मनाचा ठाव नक्कीच घेईल, यांत शंकाच नाही. ही वेब सीरिज लेखक अजिंक्य ठाकूर लिखित असून, याच्या संकलनाची बाजू प्राची पाठारे हिने उत्तमरीत्या साकारली आहे. तर, क्राईम सीनला कॅमेऱ्यात कैद करण्याची जबाबदारी शिवराज सातार्डेकर याने पेलवली आहे.
क्राईम आणि थ्रिलरचं कॉकटेल
या वेब सीरिजबद्दल बोलताना दिग्दर्शक तेजस लोखंडे असे म्हणाला की, 'सिक्रेट ऑफ गावस्कर' वेब सीरिज वेगळ्या पठडीतील असून, प्रत्येक कलाकाराने केलेले काम हे वाखाणण्याजोगे आहे. या वेब सीरिजमध्ये काम केलेलं सर्वच कलाकार माझे मित्र आहेत. साऱ्या कलाकारांचा अभिनयाचा अनुभव दांडगा असल्याने साऱ्यांनीच वेब सीरिजमध्ये उत्तम काम केलं आहे. या वेब सीरिजची कथा प्रत्येक पाचव्या मिनिटाला आपल्याला संभ्रमात पाडतेय, त्यामुळे पुढे काय होतंय याची उत्सुकता आणखीनच ताणली जातेय. या वेब सीरिजमुळे आम्ही एक वेगळा जॉनर प्रेक्षकांसमोर आणला आहे, तर माझे प्रेक्षकांना हेच आवाहन आहे की, प्रेक्षकांनी वेगळ्या जॉनरला साथ द्यावी, वेगळ्या धाटणीची ही वेब सीरिज नक्की पहा. सिक्रेट ऑफ गावस्करच सिक्रेट नेमकं काय असेल हे, तुम्हाला व्हीमास मराठीवर बघायला मिळेल.
हेही वाचा :
TOP 10 Entertainment News : दिवसभरातील दहा महत्त्वाच्या मनोरंजनविषयक बातम्या