Reshim Tipnis on Bigg Boss Marathi Season 5 : 'बिग बॉस मराठी'च्या (Bigg Boss Marathi Season 5) पाचव्या सिझनबाबत कलर्स मराठीकडून घोषणा करण्यात आली आहे. या सिझनमध्ये होस्ट म्हणून महेश मांजरेकर यांच्या जागी अभिनेता रितेश देशमुख दिसणार आहे. या मराठी बिग बॉसच्या सिझनची प्रेक्षक मागील दोन वर्षांपासून वाट पाहत होते. आता तो सीझन लवकरच प्रेक्षकांच्या भेटीला येणार आहे. पण मराठी बिग बॉसचा पहिला सिझन प्रेक्षकांच्या विशेष लक्षात राहिला. या सिझनमध्ये स्पर्धक म्हणून सहभागी झालेली अभिनेत्री रेशम टिपणीस (Reshim Tipnis) हीने नुकतच पाचव्या सिझनबाबत भाष्य केलं आहे.
रेशम ही लवकरच कलर्स मराठीवरील अंतरपाट या मालिकेतून प्रेक्षकांच्या भेटीला येणार आहे. या मालिकेत रेशम महत्त्वाची भूमिका साकारणार आहे. त्यानिमित्ताने रेशमने राजश्री मराठीसोबत संवाद साधला. त्यावेळी तिने बिग बॉस मराठीच्या पाचव्या सिझनवर भाष्य केलं आहे. तसेच रेशम हा सिझन पाहण्यासाठी देखील उत्सुक असल्याचं पाहायला मिळतंय.
रेशम टीपणीसने काय म्हटलं?
रेशमने बिग बॉस मराठीच्या पाचव्या सिझनबाबत म्हटलं की, 'रितेश या सिझनचं होस्टींग करणार आहे, त्यामुळेही मी या सिझनसाठी देखील खूप उत्साहित आहे. मला खात्री आहे की, रितेश त्याच्या स्टाईलने होस्टींग करेल, तो त्याच्या स्टाईलने दर शनिवारी शाळा घेईल. प्रत्येक सिझनप्रमाणे मी हा सिझनदेखील फॉलो करणार आहे. कारण मी त्या कार्यक्रमाचा भाग असल्याने मला तो कार्यक्रम आवडतो.'
महाराष्ट्रात पुन्हा घुमणार बिग बॉसचा आवाज
हिंदीमधल्या अफाट यशानंतर 'बिग बॉस' हा कार्यक्रम मराठीतही सुरु झाला. “बिग बॉस मराठी”चा आवाज संपूर्ण महाराष्ट्राच्या घराघरांत जाऊन पोहोचला. प्रेक्षक या कार्यक्रमावर बेहद फिदा झाले. “बिग बॉस मराठी” च्या पहिल्या चार सिझनने मराठी प्रेक्षकांची तुफान मने जिंकली आणि मराठमोळ्या थिमसह बिग बॉसच्या चारही सिझनची जोरदार चर्चा झाली. आता त्याच 'बिग बॅास' मराठीच्या नव्या सिझनची जोरात तयारी सुरू झालीय.
'बिग बॅास'चे घर ही नेहमीच रसिकांच्या औत्सुक्याची, कुतूहलाची बाब असते. बिग बॅास मराठीचे हे आलिशान घर आकार घेऊ लागले आहे. तसेच बिग बॅासच्या घरातील अतरंगी मोहरे यांचीही कसून निवड प्रक्रिया सुरू झाली आहे. या सिझनमध्ये 'बिग बॅास'च्या या घरात आणखी काय काय नाविन्य असेल, काय एक्स्ट्रा गॅासिप अर्थात एक्स्ट्रा मनोरंजन पहायला मिळणार, याकडे प्रेक्षकांचे लक्ष लागून आहे.