Raj Thackeray on Vivek Oberoi and R. Madhavan Shifted to Dubai: महाराष्ट्र नवनिर्माण विद्यार्थी सेनेच्या 20 व्या वर्धापनदिनानिमित्त आज मुंबईतील रवींद्र नाट्य मंदिर येथे भव्य कार्यक्रमाचे आयोजन करण्यात आले होते. या सोहळ्यात महाराष्ट्र नवनिर्माण सेनेचे अध्यक्ष राज ठाकरे (Raj Thackeray) आणि महाराष्ट्र नवनिर्माण विद्यार्थी सेनेचे अध्यक्ष अमित ठाकरे (Amit Thackeray) यांची प्रमुख उपस्थिती होती. या कार्यक्रमात त्यांनी जेन झी पिढीवर भाष्य केल. तसेच सत्ताधाऱ्यांवर निशाणा साधला. या भाषणादरम्यान, त्यांनी विवेक ओबेरॉय (Vivek Oberoi) आणि आर. माधवन (R. Madhavan) यांचा उल्लेख करत पंतप्रधान नरेंद्र मोदी यांच्यासमोर प्रश्न उपस्थित केला. 'या कलाकारांना जर देशावर प्रेम आहे, पंतप्रधानांवर प्रेम आहे, तसेच देशात विकास होत असल्याचा विश्वास आहे, तर ते परदेशात का जाऊन राहतायेत?', असा सणसणीत सवाल राज ठाकरेंनी उपस्थित केला.
विवेक ओबेरॉय, आर. माधवन दुबईला का शिफ्ट झाले? राज ठाकरे नेमकं काय काय म्हणाले? (Raj Thackeray on Vivek Oberoi and R. Madhavan)
भाषणादरम्यान राज ठाकरे म्हणाले, 'हजारो उद्योगपती आपला बोजा बिस्तरा बांधून परदेशात निघून गेले आहेत. एवढंच कशाला ज्यांनी पंतप्रधान नरेंद्र मोदींवर सिनेमा काढला होता. आणि ज्यांनी पंतप्रधान नरेंद्र मोदी यांची भूमिका साकारली होती, तो अभिनेता विवेक ऑबेरॉय दुबईमध्ये राहायला गेला आहे. दुबईचा नागरिक आहे तो. विवेक ऑबेरॉय आता भारतात राहत नाही. मोदीजी देशात खूप चांगलं काम करत आहेत, मोदीजी देशाला खूप मोठं करत आहेत. मोदीजी देशात उद्योग आणतायेत... वगैरे वगैरे, अशी मुक्ताफळे ज्यांनी उधळली...कोण तो आर. माधवन, विचारा तो कुठे राहतो. हा आर. माधवन दुबईमध्ये स्थायिक झालेला आहे'.
'या कलाकारांना जर देशाबद्दल प्रेम आहे, देशातील पंतप्रधानांबद्दल प्रेम आहे, ते विकास करत आहेत, असा समजा त्यांना विश्वास आहे, हे परदेशात का जाऊन राहतायेत? ', असा सणसणीत सवाल राज ठाकरेंनी उपस्थित केला. 'हे कलाकार परिवारासकट दुबईला जाऊन का राहतायेत? इथे येणार, सरकारी स्पॉन्सर चित्रपटांमध्ये काम करणार. ते 'धुरंधर' वगैरे... इथे कमाई करुन परत जाणार दुबईला. देशात खूप चांगलं चाललं आहे. मी चालो दुबईला, असं म्हणत जातात. ही माणसं दुबईला जातायेत', असं राज ठाकरे म्हणाले.
दरम्यान, राज ठाकरे यांच्या वक्तव्याची सध्या राजकीय तसेच मनोरंजन क्षेत्रात जोरदार चर्चा सुरू आहे.
महत्त्वाच्या इतर बातम्या: