Prajakta Mali Marathi Movie Fulvanti : आपल्या अभिनयाने, स्मित हास्याने चाहत्यांना घायाळ करणाऱ्या अभिनेत्री प्राजक्ता माळीने (Prajakta Mali) आपल्या वाढदिवसानिमित्ताने चाहत्यांना अनोखी भेट दिली आहे. अभिनयाच्या क्षेत्रात आपला ठसा उमटवल्यानंतर आता प्राजक्ताने सिनेनिर्मिती उतरणार असल्याची घोषणा केली होती. प्राजक्ता माळीची निर्मिती असलेल्या फुलवंती या चित्रपटाचे मोशन पोस्टर रिलीज करण्यात आले असून रिलीज डेटही जाहीर करण्यात आली आहे. फुलवंतीच्या निमित्ताने अभिनेत्री स्नेहल तरडे दिग्दर्शन म्हणून पदार्पण करत आहे. हा चित्रपट दिवगंत शिवशाहीर बाबासाहेब पुरंदरे यांच्या 'फुलवंती' या कादंबरीवरआधारीत आहे.
मागील काही महिन्यांपासून चर्चेचा विषय ठरलेल्या 'फुलवंती' या भव्य कलाकृतीच्या प्रदर्शनाची तारीख अखेर जाहीर झाली आहे. निर्माती प्राजक्ता माळी हिने आपल्या वाढदिवसाच्या निमित्ताने एक लक्षवेधी मोशन पोस्टर शेअर करत या चित्रपटाच्या प्रदर्शनाची घोषणा केली आहे. येत्या 11 ऑक्टोबर रोजी 'फुलवंती' प्रेक्षकांच्या भेटीला येणार आहे. स्नेहल प्रविण तरडे दिग्दर्शित या चित्रपटात प्राजक्ता माळी 'फुलवंती'च्या भूमिकेत झळकणार आहे.
प्राजक्ताचा घायाळ करणारा लूक
नुकत्याच झळकलेल्या मोशन पोस्टरमध्ये प्राजक्ता माळीचा कातील लूक दिसून आला आहे. एका सजलेल्या राजेशाही पालखीत भरजरी वस्त्रे आणि आभूषणे परिधान केलेली 'फुलवंती' दिमाखत बसलेली दिसत आहे. या सौंदर्यवतीच्या मोहमयी रूपाने कोणीही घायाळ होईल. पोस्टरला देण्यात आलेल्या संगीतावरून हा संगीतमय चित्रपट असल्याचा अंदाज व्यक्त केला जात आहे. रसिकप्रेक्षकांसाठी सांगीतिक नजराणा असलेला हा चित्रपट मराठी सिनेसृष्टीतील आजवरची सर्वात भव्यदिव्य, अविस्मरणीय अशी कलाकृती ठरेल असा विश्वास चित्रपटाच्या टीमने व्यक्त केला आहे.
'फुलवंती'बद्दल प्राजक्ता माळीने सांगितले की, '' या क्षणाची मी आतुरतेने वाट पाहत होते. वाढदिवसाच्या निमित्ताने मी माझ्या चाहत्यांना ही आनंदाची बातमी देऊ शकले. याबद्दल देवाचे अनेकानेक आभार मानते. 'फुलवंती' माझ्यासाठी खूप खास आहे. या चित्रपटाच्या निमित्ताने मी निर्मिती क्षेत्रात प्रवेश केला आणि मला अनेक गोष्टी शिकायला मिळाल्या. अनेकांनी मला विचारले की 'फुलवंती'च का ? फुलवंतीच्या कथानकाच्या मी प्रेमात पडले; साहित्य क्षेत्रातील काही दु्र्मिळ हिऱ्यांपैकी 'फुलवंती' एक आहे. त्यामुळे बाबासाहेबांच्या 'फुलवंती' या कांदंबरीवर चित्रपट व्हावा, अशी माझी मनापासून इच्छा होती, असेही तिने सांगितले. मागील तीन वर्षांपासून अत्यंत अभ्यास करून, मेहनत घेऊन आम्ही ही भव्य 'फुलवंती' प्रेक्षकांपर्यंत घेऊन येत असल्याचे तिने सांगितले.
पॅनोरमा स्टुडिओज प्रस्तुत, मंगेश पवार ॲन्ड कं. आणि शिवोऽहम् क्रिएशन्स प्रायव्हेट लिमिटेड निर्मित या चित्रपटाचे कुमार मंगत पाठक, अभिषेक पाठक, मंगेश पवार, श्वेता माळी, प्राजक्ता माळी निर्माते आहेत. तर अमोल जोशी प्रॉडक्शन्स, मुरलीधर छतवानी, रवींद्र औटी, सहनिर्माते आहेत तर विक्रम धाकतोडे सहाय्यक निर्माते आहेत या चित्रपटाचे संवादलेखन प्रवीण विठ्ठल तरडे यांनी केले आहे. सिनेमाटोग्राफर महेश लिमये यांनी छायाचित्रणाची तर संगीताची जबाबदारी अविनाश - विश्वजीत यांनी सांभाळली आहे. 'फुलवंती'च्या म्युझिकची जबाबदारी पॅनोरमा म्युझिकने सांभाळली आहे.