Karisma Kapoor : दिवंगत उद्योगपती संजय कपूर यांच्या सुमारे ₹30,000 कोटींच्या संपत्तीवरून सुरू असलेल्या उत्तराधिकाराचा लढा आता अधिक तीव्र झाला आहे. या प्रकरणात पारदर्शकता राखली जावी यासाठी दिल्ली उच्च न्यायालयाने हस्तक्षेप केला आहे. संजय कपूर यांची मुले म्हणजे समायरा (20) आणि किआन (15) यांच्या वतीने त्यांची आई अभिनेत्री करिश्मा कपूर न्यायालयात हजर झाली असून, त्यांनी संजय कपूर यांच्या इच्छापत्राबाबत माहिती लपवण्याचा आणि बनावट दस्तऐवज तयार केल्याचा आरोप केला आहे. संजय कपूर यांच्या निधनानंतर तब्बल सात आठवड्यांनी हे इच्छापत्र समोर आले आणि कुठलेही इच्छापत्र नसल्याचे या पूर्वी सांगण्यात आले होते.

ट्रस्टपेक्षा इच्छापत्र महत्त्वाचे

करिश्मा कपूर यांच्या मुलांचे वकील आणि वरिष्ठ विधिज्ञ महेश जेठमलानी यांनी स्पष्ट केले की, हा खटला ट्रस्टमधून मिळणाऱ्या फायद्यांबाबत नाही, तर संजय कपूर यांच्या वैयक्तिक संपत्तीतील वारसाहक्क मिळवून मुलांचे भविष्य सुरक्षित करण्यासाठी आहे. "हा खटला संजय कपूर यांच्या मुलांचे भविष्य सुरक्षित करण्यासाठी आणि भारतात व परदेशात असलेल्या संपत्तींवर त्यांचा न्याय्य हक्क सुनिश्चित करण्यासाठी लढण्यात येत आहे," असे जेठमलानी म्हणाले.

मार्च 2025च्या एक इच्छापत्रामुळे हा वाद निर्माण झाला आहे. या इच्छापत्रानुसार संजय कपूर यांची सर्व वैयक्तिक संपत्ती त्यांच्या तिसऱ्या पत्नी प्रिया सचदेव यांना देण्यात येत असल्याचा दावा करण्यात आला आहे. मात्र हे इच्छापत्र नोंदणीकृत नाही. शिवाय, कपूर यांच्या मुलांनी विचारणा केली असता त्यास नकार देण्यात आला. हे वादग्रस्त इच्छापत्र तसेच 12 जून 2025 रोजी संजय कपूर यांच्या नावावर असलेल्या संपत्तीची संपूर्ण यादी उघड करण्याचे आदेश दिल्ली उच्च न्यायालयाने दिले आहेत.

संजय कपूर यांच्या मुलांना देण्यात आलेल्या ₹1,900 कोटींच्या रकमेचा प्रश्न

प्रिया सचदेव कपूर यांच्या वकिलांनी दिल्ली उच्च न्यायालयात दावा केला की, संजय कपूर यांच्या मुलांना आर.के. कुटुंबाच्या ट्रस्टमार्फत आधीच ₹1,900 कोटी मिळाले आहेत. मात्र, सूत्रांनी दिलेल्या माहितीनुसार ही रक्कम सोना कॉमस्टार या कंपनीच्या शेअर्सच्या मूल्यावर आधारित आहे आणि हे शेअर्स अद्यापही ट्रस्टकडेच ठेवण्यात आले असून, ती रक्कम प्रत्यक्षात मुलांना मिळालेली नाही. ट्रस्टमधील प्रिया सचदेव कपूर यांच्याकडे या संपत्तीचे नियंत्रण आहे आणि मुलांना या रकमेचा अॅक्सेस नाही.

याचा संदर्भ स्पष्ट करताना महेश जेठमलानी म्हणाले, “समजा एकूण संपत्ती ₹30,000 कोटी आहे आणि त्यातून मुलांना आर.के. ट्रस्टकडून ₹1,900 कोटी मिळाल्याचा दावा केला आहे. असे असले तरीही उर्वरित ₹28,000 कोटींहून अधिक रक्कम प्रिया सचदेव कपूर यांच्या वाट्याला येते. या प्रचंड संपत्तीतील मोठा हिस्सा त्या सहज सोडून देतील का? या खटल्यामागचा उद्देश समजून घेणे गरजेचे आहे. क्लास 1 वारसांमध्ये येणाऱ्या पाचही व्यक्तींना, म्हणजेच करिश्मा आणि संजय कपूर यांच्या दोन मुलांना, संपत्तीचा अॅक्सेस मिळावा यासाठी हा खटला दाखल करण्यात आला आहे.

न्यायालयातील सुनावणीच्या अहवालानुसार, मुलांना अद्याप इच्छापत्राची प्रत देण्यात आलेली नाही. तसेच वडिलांच्या वैयक्तिक संपत्तीबाबतही कोणतीही स्पष्टता मिळालेली नाही. या घडामोडींमुळे पारदर्शकता, न्याय्यता आणि वारसाहक्कातील मुलांच्या अधिकारांबाबत तातडीने प्रश्न उपस्थित होत आहेत. हे मुद्दे केवळ एका कुटुंबापुरते मर्यादित न राहता अनेक कुटुंबांना लागू पडतात.

इतर महत्त्वाच्या बातम्या 

एलिझाबेद एकादशीमधील गोंडस चिमुकला आता झालाय 23 वर्षांचा, अभिनयापासून दूर; कोणत्या क्षेत्रात काम करतोय?