Hawahawai : ‘द ग्रेट इंडियन किचन’ यासारख्या बहुचर्चित, तसेच अनेक मल्याळम सिनेमातून आपल्या सशक्त अभिनयाचं दर्शन घडवलेली अभिनेत्री निमिषा सजयन (Nimisha Sajayan) आता ‘हवाहवाई’ (Hawahawai) या चित्रपटाद्वारे मराठी चित्रपटसृष्टीत पदार्पण करत आहे. ‘हवाहवाई’ हा चित्रपट 7 ऑक्टोबरला प्रदर्शित होणार असून, चित्रपटाचं मोशन पोस्टर सोशल मीडियाद्वारे लाँच करण्यात आले असून, अभिनेत्री निमिषा सजयन आणि अभिनेता विजय आंदळकर (Vijay Andalkar) ही फ्रेश जोडी याचित्रपटाच्या निमित्ताने रुपेरी पडद्यावर झळकणार आहे.
स्वयंपाकघरात टिफिन हातात घेऊन उभं असलेलं जोडपं या मोशन पोस्टरमध्ये दिसत आहे. महेश टिळेकर यांच्या आधीच्या ‘वन रूम किचन’ या मराठी सिनेमा सारखा ‘हवाहवाई’ हा सुद्धा कौटुंबिक चित्रपट असणार आहे, असा अंदाज बांधता येतो. चित्रपटातील बाकी कलाकार कोण? कथा काय असणार? अशा प्रश्नांची उत्तरंही लवकरच मिळणार आहेत. मात्र, मोशन पोस्टरमुळे आता 7 ऑक्टोबरला प्रदर्शित होणाऱ्या या चित्रपटाविषयी उत्सुकता वाढली आहे.
पाहा मोशन पोस्टर :
‘या’मुळे ‘हवाहवाई’ चित्रपट चर्चेत!
मराठी तारका प्रॉडक्शन्सचे महेश टिळेकर आणि नाईनटिन नाईन प्रॉडक्शन्सचे विजय शिंदे ‘हवाहवाई’ या चित्रपटाची निर्मिती केली आहे. तर, महेश टिळेकर यांनी चित्रपटाचं लेखन, दिग्दर्शन आणि संकलन केलं आहे. विशेष म्हणजे ज्येष्ठ गायिका आशा भोसले यांनी वयाच्या 88व्या वर्षी या चित्रपटातलं उडत्या चालीचं एक गाणं गायलं आहे. निमिषा सजयन पदार्पण, आशा भोसले यांचं गाणं यामुळे ‘हवाहवाई’ हा चित्रपट चर्चेत आहे. अक्षयकुमार, जयाप्रदा, हेलन या हिंदी कलाकारांनी महेश टिळेकर यांच्याच चित्रपटातून मराठी चित्रपटसृष्टीत पदार्पण केलं होतं. त्यात आता निमिषा सजयन या नावाचीही भर पडत आहे.
‘हवाहवाई’ या चित्रपटातील भूमिका तिला साजेशी असल्यानं निमिषाला मराठीत पहिला ब्रेक देण्याचं ठरवलं, असं महेश टिळेकर यांनी सांगितलं. साऊथचे चित्रपट इतर भाषेत भाषांतरीत होऊन प्रदर्शित होत असताना, साऊथ मधील उत्तम अभिनय करणाऱ्या कलाकारांना मराठी चित्रपटात आणण्याचा नवा ट्रेण्ड महेश टिळेकर यांनी हवाहवाई सिनेमातून सुरू केला आहे. निमिषा सजयनसह मराठीतील काही प्रसिद्ध कलाकारांच्या या चित्रपटात भूमिका असून, अनेक नवीन कलाकारांनाही या चित्रपटात संधी देण्यात आली आहे.
हेही वाचा :
वयाच्या 88व्या वर्षी सुप्रसिद्ध ज्येष्ठ गायिका आशा भोसले यांनी गायलं 'हवाहवाई' चित्रपटासाठी गाणं!