Dhurandhar 2 Controversy: धुरंधर चित्रपटाने भारतीयच नाही तर जगभरात आपला डंका वाजवला. या चित्रपटाचे सगळीकडे एकच हवा झाली. आता धुरंधर 2 या चित्रपटाची चर्चा सुरु झालीय. या चित्रपटाचं शुटिंगही सुरु आहे. मात्र, चित्रपटाच्या शूटिंगदरम्यान घडलेल्या एका चुकीमुळे हा चित्रपट कायद्याच्या कचाट्यात सापडलाय. साऊथ मुंबईतील अतिसंवेदनशील फोर्ट परिसरात परवानगीशिवाय ड्रोन उडवल्याप्रकरणी ‘धुरंधर 2’ चित्रपटाच्या लोकेशन मॅनेजरविरोधात मुंबई पोलिसांनी गुन्हा दाखल केला आहे. या घटनेमुळे चित्रपटसृष्टीत एकच खळबळ उडाली असून, शूटिंगदरम्यान नियमांचे उल्लंघन झाल्याचा आरोप पोलिसांकडून करण्यात आला आहे. ही घटना 1 फेब्रुवारी रोजी घडली असून, त्या दिवशी अभिनेता संजय दत्त यांच्यासह ‘धुरंधर 2’ चित्रपटाची संपूर्ण टीम शूटिंगसाठी फोर्ट परिसरात उपस्थित होती.
नेमकं घडलं काय?
मिळालेल्या माहितीनुसार, एमआरए मार्ग पोलीस ठाण्यात 1 फेब्रुवारी रोजी रिंकू राजपाल वाल्मिकी यांच्याविरोधात भारतीय न्याय संहिता (BNS) कलम 223 अंतर्गत एफआयआर दाखल करण्यात आला आहे. या कलमानुसार अधिकाऱ्यांच्या वैध आदेशांचे जाणीवपूर्वक उल्लंघन केल्याचा ठपका ठेवण्यात आला आहे. पोलिसांनी दिलेल्या माहितीनुसार, चित्रपटाच्या शूटिंगदरम्यान एका महत्त्वाच्या सीनसाठी ड्रोनचा वापर करण्यात आला होता. मात्र, त्यासाठी आवश्यक असलेली कोणतीही अधिकृत परवानगी घेण्यात आलेली नव्हती.
ही घटना 1 फेब्रुवारी रोजी घडली असून, त्या दिवशी अभिनेता संजय दत्त यांच्यासह ‘धुरंधर 2’ चित्रपटाची संपूर्ण टीम शूटिंगसाठी फोर्ट परिसरात उपस्थित होती. हा शूटिंग शेड्यूलचा तिसरा दिवस असल्याची माहिती पोलिसांनी दिली आहे. सुरक्षेच्या दृष्टीने संवेदनशील मानल्या जाणाऱ्या या परिसरात ड्रोन उडवण्यासाठी विशेष परवानगी आवश्यक असते. मात्र, नियमांची पूर्तता न करता ड्रोनचा वापर केल्याने पोलिसांनी तात्काळ कारवाई केली.
फोर्ट परिसराचा लूक बदलला
दरम्यान, चित्रपटाच्या शूटिंगसाठी 30 जानेवारीपासून ऐतिहासिक फोर्ट परिसराचा लूक पूर्णपणे बदलण्यात आला होता. या भागाला पाकिस्तानमधील एका गजबजलेल्या जुन्या गल्लीसारखा देखावा देण्यात आला होता. त्यामुळे या सेटने अनेकांचे लक्ष वेधून घेतले होते. मात्र, ड्रोन प्रकरणामुळे आता ‘धुरंधर 2’च्या शूटिंगवर आणि निर्मिती प्रक्रियेवर प्रश्नचिन्ह उपस्थित होत आहे.या प्रकरणाचा पुढील तपास मुंबई पोलीस करत असून, चित्रपटाच्या टीमकडून यावर कोणती भूमिका घेतली जाते, याकडे सर्वांचे लक्ष लागले आहे.