Sheezan Khan KKK 13 : छोट्या पडद्यावरील लोकप्रिय अभिनेता शीझान खान (Sheezan Khan) सध्या रोहित शेट्टीच्या (Rohit Shetty) 'खतरों के खिलाडी 13' (Khatron Ke Khiladi 13) या कार्यक्रमाचं शूटिंग करत आहेत. सध्या तो दक्षिण आफ्रिकेत आहे. सहस्पर्धकांसोबतचे फोटो ते सोशल मीडियावर शेअर करत असतात. नुकतचं त्याने अलीबाबाच्या कॉस्ट्यूममधले फोटो सोशल मीडियावर शेअर केले आहेत.
तुनिषा शर्माच्या (Tunisha Sharma) निधनानंतर शीझान खान चर्चेत आला होता. तुनिषाच्या आत्महत्येला शीझान जबाबदार असल्याचा आरोप अभिनेत्रीच्या आईने केला होता. त्यानंतर त्याला पोलिसांनी अटक केली होती. दरम्यान शीझान 'अली बाबा : दास्तान-ए-काबुल' या मालिकेत मुख्य भूमिकेत होता. या मालिकेत त्याने अलीबाबाची भूमिका साकारली होती. पण तुनिषाच्या निधनानंतर त्याला मालिकेतून काढण्यात आले. पण आता 'खतरों के खिलाडी 13'च्या शूटिंगदरम्यान शीझान खानने अलीच्या वेशातील फोटो सोशल मीडियावर शेअर केला आहे.
दक्षिण आफ्रिकेत शीझान खानने अलीबाबाचा पेहराव परिधान केला होता. शीझानचा एक व्हिडीओ सोशल मीडियावर व्हायरल होत आहे. या व्हिडीओमध्ये तो म्हणत आहे,"अलीला मी कधी सोडलं नाही...मी अली होतो आणि कायम अली राहणार... आता एका नवीन प्रवासाला सुरुवात करत आहे. एक कलाकार नेहमी चांगल्या भूमिकांच्या शोधात असतो. नेहमी पुढे जायला हवं... मी खूप आनंदी आहे".
'खतरों के खिलाडी 13'चं (Khatron Ke Khiladi 13) शूटिंग सुरू झालं आहे. या पर्वात सहभागी होणारे सर्व स्पर्धक दक्षिण आफ्रिकेत पोहोचले आहेत. शीझान खानही दक्षिण आफ्रिकेत असून 'खतरों के खिलाडी 13'च्या शूटिंगला त्याने सुरुवात केली आहे. 'खतरों के खिलाडी 13'च्या शूटिंगदरम्यानचे फोटो आणि व्हिडीओ व्हायरल होत आहे. यात शीझान खानही दिसत आहे.
अभिनेत्री तुनिषा शर्मा आत्महत्या प्रकरणातील आरोपी शीझान खानची तुरुंगातून सुटका झाली आणि लगेचच त्याला 'खतरों के खिलाडी 13'साठी विचारणा झाली. 'खतरों के खिलाडी 13'चं शूटिंग दक्षिण आफ्रिकेत होत असल्याने त्याला पासपोर्टची आवश्यकता होती. परदेशात जाण्यासाठी त्याने न्यायालयाकडे परवानगी मागितली होती. त्यानंतर वसई न्यायालयाने त्याला आंतरराष्ट्रीय प्रवासासाठी पासपोर्ट परत दिला. आता शीजान खान 'खतरों के खिलाडी 13' च्या शूटिंगसाठी दक्षिण आफ्रिकेत आहे.
संबंधित बातम्या