Shah Rukh Khan Ask Me Anything On Twitter : बॉलिवूड अभिनेता शाहरुख खान (Shah Rukh Khan) सध्या त्याच्या आगामी 'पठाण' (Pathaan) या सिनेमामुळे चर्चेत आहे. आता शाहरुखने या सिनेमाच्या प्रमोशनला सुरुवात केली आहे. रविवारी त्याने नाताळच्या निमित्ताने 'Ask Me Anything' या सेशनच्या माध्यमातून चाहत्यांसोबत संवाद साधला. या सत्रात चाहत्यांनी शाहरुखला अनेक प्रश्न विचारले. या प्रश्नांची शाहरुखने मजेशीर उत्तरे दिली आहेत.
बॉडी बनवायला किती वेळ लागला?
'Ask Me Anything' या सत्रादरम्यान शाहरुखच्या एका चाहत्याने त्याचा 'पठाण' सिनेमातील एक फोटो शेअर केला. फोटो शेअर करत त्याने विचारले,"अशी बॉडी बनवायला किती वेळ लागला?". यावर उत्तर देत किंग खान म्हणाला," भावा, 57 वर्षे". शाहरुखने बॉडी बनवायला खूप मेहनत घेतली आहे. वयाच्या 57 व्या वर्षी 'पठाण' सिनेमासाठी त्याने शरीरावर प्रचंड मेहनत घेतली आहे. या सिनेमाचा टीझर आणि गाण्यांमधून याची झलक चाहत्यांना पाहायला मिळाली आहे.
दुसऱ्या एका चाहत्याने शाहरुखला विचारलं आहे, "तू हेलिकॉप्टर उडवायला कधी शिकलास?" यावर उत्तर देत बादशाह म्हणाला,"सायकल चावण्यासोबतच". आणखी एका चाहत्याने विचारले,"तू 'पठाण'चा ट्रेलर का रिलीज करत नाहीस? यावर उत्तर देत शाहरुख म्हणाला,"हा..हा... माझी इच्छा".
25 जानेवारीला 'पठाण' प्रेक्षकांच्या भेटीला (Pathaan Release Date) :
शाहरुख खानचा आगामी 'पठाण' हा सिनेमा येत्या 25 जानेवारीला प्रेक्षकांच्या भेटीला येणार आहे. या सिनेमात शाहरुखसह बॉलिवूड अभिनेता जॉन अब्राहम (John Abraham) आणि अभिनेत्री दीपिका पदुकोण (Deepika Padukone) झळकणार आहे. या सिनेमाची चाहते आतुरतेने वाट पाहत आहेत. पण काही कारणाने सध्या हा सिनेमा वादाच्या भोवऱ्यात अडकला आहे.
शाहरुखचे आगामी सिनेमे (Shah Rukh Khan Upcoming Movies) :
शाहरुख खानचा 'पठाण' हा सिनेमा 25 जानेवारी 2023 रोजी सिनेमागृहात प्रदर्शित होणार आहे. या सिनेमासह त्याचे अनेक सिनेमे पाईपलाईनमध्ये आहेत. त्याच्या आगामी सिनेमाच्या यादीत 'डंकी' (Dunki) सिनेमाचा समावेश आहे. या सिनेमात त्याच्यासोबत तापसी पन्नू (Taapsee Pannu) स्क्रीन शेअर करताना दिसणार आहे. राजकुमार हिरानी या सिनेमाच्या दिग्दर्शनाची धुरा सांभाळणार आहेत. तसेच शाहरुखचा 'जवान' हा सिनेमादेखील लवकरच प्रेक्षकांच्या भेटीला येणार आहे.
संबंधित बातम्या