मुंबई : दिवंगत शिवसेनाप्रमुख  बाळासाहेब ठाकरे यांचा जीवनपट असलेला ‘ठाकरे’ हा सिनेमा पुढील वर्षी रिलीज होणार आहे. या सिनेमात बाळासाहेबांची भूमिका साकारणाऱ्या अभिनेता नवाजुद्दीन सिद्दीकीचा नवा लूक समोर आला आहे.


ख्यातनाम समीक्षक तरण आदर्श यांनी ‘ठाकरे’ सिनेमातील नवाजुद्दीनचा एक लूक नुकताच ट्विटरवरुन शेअर केला. तरण आदर्श यांनी शेअर केलेल्या या फोटोत बाळासाहेबांच्या भूमिकेतील नवाजुद्दीन आणि  ‘ठाकरे’ सिनेमाचे सहनिर्माते संजय राऊत हे दिसत आहेत.


सिनेमात बाळासाहेब ठाकरेंची भूमिका साकारण्यासाठी अभिनेता नवाजुद्दीनने विशेष मेहनत घेतल्याचं दिसत आहे. त्यामुळेच नवाजुद्दीनचा लूक हुबेहूब बाळासाहेबांसारखा असलेला पाहायला मिळत आहे.

‘ठाकरे’ सिनेमाचं दिग्दर्शन अभिजीत पानसे यांनी केलं आहे. हा सिनेमा बाळासाहेबांच्या जयंतीदिनी म्हणजेच 23 जानेवारी 2019 ला प्रदर्शित होईल.

दरम्यान, शिवसेना पक्षप्रमुख उद्धव ठाकरे आणि महानायक अमिताभ बच्चन यांच्या उपस्थितीत ‘ठाकरे’ सिनेमाचा टीझर मागच्या वर्षी डिसेंबरमध्ये प्रदर्शित झाला होता.