तनुश्री दत्ताने केलेल्या आरोपांबदद्ल पोलिसांनी 15 जणांचे जबाब नोंदवून घेतले, पण त्यापैकी एकानेही दशकभरापूर्वी झालेल्या या कथित लैंगिक छळाला दुजोरा दिला नसल्याची माहिती आहे. अभिनेत्री डेझी शाहचीही या 15 जणांमध्ये चौकशी झाली होती. मात्र तनुश्रीने वर्णन केलेल्या घटनेशी साधर्म्य साधणारा जबाब कोणीही नोंदवला नाही, असं 'बॉलिवूडलाईफ.कॉम' या वेबसाईटवरील रिपोर्टमध्ये म्हटलं आहे.
तनुश्रीचे सवाल
'ज्या 15 जणांचे जबाब नोंदवण्यात आले, ते कोण होते? ते माझ्या बाजूने होते की नानाच्या? ते नानाचे मित्र होते. मग ते माझी बाजू उचलून का धरतील? माझा छळ झाल्याचं सिद्ध करायला मला कोणत्याही साक्षीदारांची गरज नाही. अत्याचाराच्या प्रकरणात न्यायालयात सत्य सिद्ध करणं काही वेळा कठीण असतं. पोलिसांनी चौकशीत प्रचंड चालढकलपणा केला. त्यांनी ज्यांचे जबाब नोंदवले, त्यापैकी बऱ्याच जणांनी माझा छळ होताना पाहूनही मला पाठिंबा दिला नाही. मग आता ते माझ्या बाजूने का बोलतील? गुन्हेगारांचं रक्षण करुन स्त्रीला खोटं ठरवण्याची अशा लोकांची मानसिकता असते' असं उत्तर नाना पाटेकर यांना क्लीन चिट मिळाल्यानंतर तनुश्रीने 'मिड-डे'शी बोलताना दिलं.
'ज्यांना माझ्या बाजूने बोलण्याची इच्छा आहे, त्यांना नाना पाटेकरांच्या माणसांकडून धमक्यांचे फोन येत आहेत. साक्षीदारांना त्यांचा खरा जबाब नोंदवण्यासाठी तयार करायला आम्हाला खूप अडचणी आल्या.' असा आरोपही तनुश्रीने केला आहे.
काय आहे प्रकरण?
'हॉर्न ओके प्लीज' चित्रपटाच्या सेटवर 2008 साली अभिनेते नाना पाटेकर यांनी गैरवर्तन केल्याचा आरोप तनुश्री दत्ताने केला होता. 'हॉर्न ओके..' सिनेमाच्या एका स्पेशल गाण्याचं शूटिंग सुरु होतं. त्यावेळी नाना पाटेकरांनी मला बाहुपाशात घेतलं. कोरिओग्राफर्सना दूर व्हायला सांगून डान्स कसा करावा, हे ते दाखवत होते, असा दावा तनुश्रीने केला होता.
'झूम टीव्ही'ला दिलेल्या मुलाखतीत तनुश्रीने हा आरोप केला होता. तो 'सोलो' डान्स असल्याचं काँट्रॅक्टमध्ये स्पष्ट लिहिलेलं असतानाही त्यांना माझ्यासोबत इन्टिमेट सीन करायचा होता. मी इतकी अनकम्फर्टेबल झाले, की अखेर मी ते गाणं न करण्याचा निर्णय घेतला. तो अनुभव आठवून मी आजही दचकते, असं तनुश्री म्हणाली होती.
VIDEO | मुंबई | जे खोटं आहे, ते खोटंच आहे,' तनुश्रीच्या आरोपांवर नानांचं उत्तर
तनुश्रीने अभिनेता नाना पाटेकर, हॉर्न ओके प्लीज चित्रपटाचे दिग्दर्शक राकेश सारंग, कोरिओग्राफर गणेश आचार्य आणि निर्माते सामी सिद्दीकी यांच्याविरोधात गुन्हा दाखल केला होता.
तनुश्री दत्ता ने नाना पाटेकरांविरोधात आरोप केल्यानंतर #MeToo या चळवळीअंतर्गत देशभरातील विविध क्षेत्रातल्या महिलांनी आपल्यावर झालेले लैंगिक अत्याचार, गैरवर्तन यांच्याविषयी आवाज उठवायला सुरुवात केली आहे.
डेझी शाह 'त्या' दिवशी सेटवर
'हॉर्न ओके प्लीज' या चित्रपटातील गाण्याच्या चित्रीकरणादरम्यान नाना पाटेकर यांनी छेडछाड केल्याचा आरोप तनुश्रीने केला होता. 2008 साली त्या गाण्याच्या चित्रीकरणाच्यावेळी डेझीदेखील सेटवर उपस्थित होती. तनुश्रीने नानांवर आरोप केल्यांनातर डेझीने माध्यमांसमोर याबाबत माहिती दिली होती. त्यामुळे पोलिसांनी चौकशीसाठी डेझीला पोलिस ठाण्यात बोलावलं होतं.
काय म्हणाली होती डेझी?
'तेव्हा मी असिस्टंट कोरिओग्राफर म्हणून काम करत होते. मी तनुश्रीला काही डान्स स्टेप्स शिकवत होते. सुरुवातीचे दोन दिवस सर्व काही सुरळीत सुरु होते. परंतु तिसऱ्या दिवशी अचानक काहीतरी झाले. तनुश्री खूप धक्क्यात असल्याचं आम्ही सर्वांनी पाहिलं. नेमकं काय झालं होतं, हे मला माहीत नाही, परंतु मी तनुश्रीच्या सोबत आहे.' असं डेझी म्हणाली होती.
कोण आहे तनुश्री दत्ता?
2003 साली फेमिना मिस इंडियाचा किताब जिंकल्यानंतर तनुश्रीने 2005 मध्ये बॉलिवूडमध्ये पदार्पण केलं. 'आशिक बनाया आपने' हा सिनेमा गाजल्यानंतर तिने चॉकलेट, ढोल, रिस्क, स्पीडसारखे काही सिनेमे केले. 2010 नंतर मात्र ती बॉलिवूडमध्ये दिसली नाही. पण तिने यापूर्वीही नाना पाटेकरांबाबत घडलेला हा किस्सा अनेकवेळा सांगितला आहे.
नाना पाटेकरांची बाजू काय?
दहा वर्षांपूर्वी 'हॉर्न ओके प्लीज'च्या सेटवर नाना पाटेकर यांनी गैरवर्तन केल्याचा आरोप तनुश्री दत्ताने केल्यानंतर नाना पाटेकर यांनी पत्रकार परिषद घेऊन तनुश्री मला मुलीसारखी असल्याचं म्हटलं होतं.
तनुश्री दत्ताच्या आरोपांवर उत्तर देणं नाना पाटेकर यांनी टाळलं होतं. जे खोटं आहे, ते खोटं आहे, असं म्हणत मला वकिलांकडून मीडियाशी न बोलण्याचा सल्ला देण्यात आल्याचं नाना पाटेकर म्हणाले. तर तनुश्री दत्ताच्या आरोपांमध्ये अजिबात तथ्य नाही, असं दिग्दर्शक राकेश सारंग यांनी 'एबीपी माझा'ला दिलेल्या मुलाखतीत म्हटलं होतं.
तनुश्री दत्ताने मनसे अध्यक्ष राज ठाकरेंवर गंभीर आरोप केला. मनसे अध्यक्ष राज ठाकरेंना बाळासाहेब ठाकरेंची खुर्ची हवी होती, ती मिळाली नाही म्हणून ते तोडफोड करतात, असंही तनुश्री म्हणाली होती.