मुंबई : 'दंगल' चित्रपटात राष्ट्रगीताच्या सीनला उभं न राहिल्यामुळे एका प्रेक्षकाला मारहाण झाल्याचं वृत्त आहे. मुंबईतल्या गोरेगावमधील एका चित्रपटगृहात 59 वर्षीय प्रेक्षकाच्या तोंडावर फटकावल्याची माहिती 'मिड डे' या वृत्तपत्राने दिली आहे. अमलराज दासन नावाचा प्रेक्षक गेल्या बुधवारी गोरेगावमधील एका थिएटरला 'दंगल' चित्रपट पाहण्यासाठी गेला होता. चित्रपटातील एका सीनमध्ये राष्ट्रगीताची धून वाजते. मात्र या सीनच्या वेळी उभं न राहिल्याने एका प्रेक्षकाने अमलराज यांच्या तोंडावर फटकावल्याचं वृत्त आहे. चित्रपटात अभिनेता आमीर खानने कुस्तीवीर महावीर फोगाट यांची भूमिका साकारली आहे. महावीर यांची कन्या गीता फोगाट कॉमनवेल्थ गेम्समध्ये सुवर्णपदक पटकावते. त्यानंतर तिला पदक बहाल करताना पार्श्वभूमीला भारतीय राष्ट्रगीताची धून वाजते. त्यावेळी उभं न राहिल्याने हा वाद झाला. दरम्यान, आरोपी शिरीष मधुकर यांच्यावर गुन्हा दाखल झाल्याची माहिती पोलिसांनी दिली आहे. कलम 323 ( जाणूनबुजून दुखापत करणे) आणि 504 ( शांततेचा भंग करण्याच्या उद्देशाने मुद्दाम अवमान करणे) अंतर्गत गुन्हा दाखल झाला आहे. यापूर्वीही चित्रपटाच्या सुरुवातीला राष्ट्रगीत सुरु असताना उभं न राहिल्याने प्रेक्षकांमध्ये वाद झाल्याची उदाहरणं पाहायला मिळाली आहेत.

चित्रपट सुरु होण्याआधी थिएटरमध्ये राष्ट्रगीत लावा : सर्वोच्च न्यायालय

देशभरातील चित्रपटगृहांमध्ये राष्ट्रगीत अनिवार्य आहे. चित्रपट सुरु होण्यासाठी थिएटरमध्ये राष्ट्रगीतासह पडद्यावर राष्ट्रध्वज दाखवा, असा आदेशच सर्वोच्च न्यायालयाचा देशभरातील चित्रपटगृहांना दिला आहे. राष्ट्रगीताच्या सन्मानार्थ उभं राहणंही गरजेचं असल्याचं सर्वोच्च न्यायालयाने सांगितलं. तसंच कोणत्याही परिस्थिती अपूर्ण राष्ट्रगीत लावण्यास परवानगी नसेल, असंही न्यायालयाने नमूद केलं.

थिएटरमध्ये राष्ट्रगीतावेळी अपंगांना उभं राहण्याची सक्ती नाही

अपंगांना राष्ट्रगीताच्या वेळी उभं राहण्यात सूट देण्यात आली आहे. सुप्रीम कोर्टानं राष्ट्रगीतावेळी चित्रपटगृहाचे दरवाजे बंद ठेवण्याचाही आदेश दिला आहे. हा आदेश राष्ट्रगीतावेळी शांतता आणि शिस्त राखली जावी यासाठी दिल्याचं कोर्टानं स्पष्ट केलं आहे. राष्ट्रगीतावेळी प्रेक्षकांनी चित्रपटगृहातून बाहेर जाऊ नये यासाठी हा निर्णय घेतल्याचंही कोर्टानं स्पष्ट केलं. मात्र दरवाजा बाहेरुन बंद करण्यास कोर्टानं सांगितलेलं नाही.