गाझियाबादमधील राजनगरमधील सतेंद्र त्यागी यांनी रेमोवर कोटयवधी रुपयांचा गंडा घातल्याचा आरोप करत तक्रार दिली आहे. रेमोच्या सांगण्यावरून त्यांनी साल 2013 मध्ये 'अमर मस्ड डाय' या सिनेमात पाच कोटी रुपये गुंतवले होते. चित्रपट रिलिजनंतर दुप्पट पैसे मिळवून देण्याचं आमिष रेमोने दिले होते. याबाबत रेमोकडे विचारणा केली असता रेमोने पैसे परत करण्यास नकार दिला. शिवाय त्यांच्यावर प्राणघातक हल्ला करण्याचा प्रयत्नही केला असे आरोप करत सतेंद्र त्यागी यांनी सिहानी गेट पोलीस ठाण्यात साल 2016 मध्ये रेमोविरोधात तक्रार दाखल केली होती. अखेर या प्रकरणी गाझियाबाद येथील दंडाधिकारी न्यायालयासमोर सुनावणी पार पडली. तेव्हा, याआधी पार पडलेल्या सुनावणीदरम्यान समंन्स बजावूनही रेमो गैरहजर राहिल्यामुळे रेमोविरोधात 23 ऑक्टोबर 2019 रोजी गाझियाबाद दंडाधिकारी न्यायालयानं अजामीनपात्र अटक वॉरंट जारी केले आहे. या अटकेतून दिलासा मिळवण्यासाठी रेमो डिसूझाने मुंबई उच्च न्यायालयात धाव घेतली होती.
त्यावर सुट्टीकालीन कोर्टात न्यायमूर्ती के. के. तातेड यांच्यासमोर सुनावणी पार पडली. तेव्हा, मुंबई पोलीसांना गाझियाबाद पोलीसांकडून अद्याप वॉरंट मिळालेले नाही. त्यामुळे तूर्तास रेमोवर कारवाई करण्याचा प्रश्नच उद्भवत नाही, अशी माहिती अतिरिक्त सरकारी वकीलांनी कोर्टाला दिली त्याची दखल घेत हायकोर्टानं ही याचिका फेटाळून लावली.