RRR Movie Naatu Naatu Song : 95 व्या ऑस्कर पुरस्कार सोहळ्यात भारतीय सिनेसृष्टीने इतिहास रचला आहे. 'आरआरआर' (RRR) या सिनेमातील 'नाटू नाटू' या गाण्याने 'ऑस्कर 2023'मध्ये (Oscars 2023) बेस्ट ओरिजनल सॉन्ग या श्रेणीमधील पुरस्कारावर नाव कोरलं आहे. आता नुकत्याच समोर आलेल्या एका रिपोर्टनुसार,'नाटू नाटू' या गाण्याला ऑस्कर मिळाल्यानंतर गूगलवर या गाण्याचं सर्चिंग 1,105 पटीने वाढलं आहे.
'नाटू नाटू' (Naatu Naatu) या गाण्याला ऑस्कर मिळाल्यानंतर जगभरातील सिनेप्रेमी 'नाटू नाटू' हे गाणं गूगलवर सर्च करत आहेत. मार्चमध्ये रिलीज झालेल्या या गाण्याला टिक-टॉकवर 52.6 मिलियन व्ह्यूज मिळाले आहेत. ऑस्कर पुरस्कार सोहळ्यात 'नाटू नाटू' या गाण्याने सर्वांचं लक्ष वेधून घेतलं होतं. या सोहळ्यात काल भैरव आणि राहुल सिपलीगुंज यांनी हे गाणं गायलं. त्यांच्या गायणाला प्रेक्षकांनी चांगलीच दाद दिली. ओस्कर पुरस्कार सोहळ्यात या गाण्याला 'स्टँडिंग ओव्हेशन'देखील मिळालं.
'आरआरआर' हा सिनेमा 2022 मध्ये प्रेक्षकांच्या भेटीला आला होता. या सिनेमाने रेकॉर्डब्रेक कमाई केली होती. देशासह परदेशातदेखील या सिनेमाने चांगलाच धुमाकूळ घातला. या सिनेमातील 'नाटू नाटू' हे गाणं प्रेक्षकांच्या पसंतीस उतरलं. हे गाणं चंद्रबोसने लिहिलं आहे तर एमएस किरावणीने संगीतबद्ध केलं आहे. 'नाटू नाटू' हे गाणं हिंदीत 'नाचो नाचो', तामिळमध्ये 'नट्टू कूथु' आणि कन्नडमध्ये 'हल्ली नातु' म्हणून रिलीज करण्यात आले आहे.
पुरस्कार सोहळ्यात 'नाटू नाटू'ची धूम
'ऑस्कर 2023'मध्ये एस.एस राजामौलींच्या आरआरआर सिनेमातील 'नाटू नाटू' या गाण्याने इतिहास घडवला आहे. ऑस्करआधी 'नाटू नाटू' या गाण्याला गोल्डन ग्लोब पुरस्कारानेही गौरवण्यात आलं आहे. या गाण्यावर प्रेम रक्षित यांनी केलेल्या कमालीच्या नृत्यदिग्दर्शनालाही प्रेक्षकांनी पसंती दर्शवली आहे.
'आरआरआर 2' लवकरच येणार प्रेक्षकांच्या भेटीला (RRR 2 Release)
'आरआरआर' (RRR) या सिनेमाच्या यशानंतर दिग्दर्शक एसएस राजामौली (SS Rajamouli) यांनी या सिनेमाच्या दुसऱ्या भागाची अर्थात 'आरआरआर 2'ची (RRR 2) घोषणा केली आहे. सध्या या सिनेमाच्या कथानकावर काम सुरू असून लवकरच या सिनेमाचा दुसरा भाग प्रेक्षकांच्या भेटीला येणार आहे.
संबंधित बातम्या