Maharani 2 : काही कथा आपल्‍या मनावर अनोखी छाप निर्माण करतात आणि आपल्‍यामध्‍ये अधिकाधिक उत्सुकता निर्माण करतात. सोनी लिव्‍हची सीरिज 'महारानी'ची (Maharani 2) कथा देखील अशीच आहे. या सीरिजने लक्षवेधक कथानकासह प्रेक्षकांचे लक्ष वेधून घेतले आहे. प्रबळ राजकीय नेता म्‍हणून उदयास येण्‍यासाठी समाजातील पुरूषप्रधान अडथळ्यांचा सामना करणाऱ्या प्रमुख नायिकेच्‍या अवतीभोवती केंद्रित या सीरिजच्या मागील पर्वाने प्रेक्षकांमध्ये अधिक उत्सुकता निर्माण केली. प्रेक्षकांच्‍या प्रतिक्षेचा शेवट करत ही सीरिज उत्‍साहवर्धक अशा दुसऱ्या पर्वासह परतली आहे. या सीरिजमध्ये आता अभिनेत्री अनुजा साठे (Anuja Sathe) देखील महत्त्वपूर्ण भूमिकेत दिसणार आहे.
राजकीय उमेदवाराच्‍या भूमिकेत प्रवेश करत अनुजा साठे ‘किर्ती सिंह’ची भूमिका साकारणार आहे. ‘किर्ती सिंह’ हे असे पात्र आहे, जे भीमा भारतीचे (सोहम शाह) विश्‍वासू बनते. आपल्‍या भूमिकेबाबत बोलताना ती म्‍हणाली, ‘मी भूमिकांसंदर्भात नेहमीच नशीबवान राहिली आहे. हाच ट्रेंड कायम राखत प्रेक्षकांना मी या सीरिजमध्ये नवीन अवतारात पाहायला मिळेन. किर्ती वास्‍तविक जीवनात मी जशी आहे, त्‍यापेक्षा पूर्णत: विरूद्ध आहे. म्‍हणून अभिनेत्री म्‍हणून माझ्यासाठी हा उत्‍साहवर्धक व समाधानकारक अनुभव होता. मला माझ्या भूमिकेचे विविध पैलू साकारताना स्‍वत:मध्ये बदल करावे लागले. सर्व कलाकार व टीम अत्‍यंत सहाय्यक राहिली आहे आणि मी त्‍या सर्वांसोबत काम करताना खूप धमाल केली.’
नव्या पर्वाची उत्सुकता
'महारानी 2'चे दिग्‍दर्शन रविंद्र गौतम यांनी केले आहे, तर सुभाष कपूर व नंदन सिंह हे या सीरिजचे लेखक आहेत. हुमा कूरेशी प्रमुख भूमिकेत असलेल्‍या या सीरिजमध्ये सोहम शाह, अमित सियाल, विनीत कुमार, इनाम उल हक, दिब्‍येंदू भट्टाचार्य, कनी कस्‍तुरी, प्रमोद पाठक आणि विनीत कुमार हे देखील प्रमुख भूमिकेत असणार आहेत.
'महारानी 1'मध्ये हुमा कुरेशी एका वेगळ्या अवतारात दिसली होती. यामध्ये तिने ग्रामीण घरातील राणी भारती या स्त्रीची भूमिका साकारली होती, जी पुढे राजकारणात प्रवेश करते. या वेब सीरिजची कथा प्रामुख्याने बिहारच्या राजकारणावर आधारित आहे. हुमा कुरेशी व्यतिरिक्त या सीरिजच्या पहिल्या सीझनमध्ये देखील सोहम शाह, अमित सियाल, मोहम्मद आशिक हुसैन, इनामुलहक, विनीत कुमार आणि तनु विद्यार्थी हे देखील मुख्य भूमिकेत दिसले होते.
हेही वाचा :
Web Series : ओटीटीवरील 'या' वेब सीरिज करतील जबरदस्त मनोरंजन