Asha Kale: मराठी मनोरंजनसृष्टीतील अनेक गाजलेल्या भूमिकांमध्ये दिसलेल्या ज्येष्ठ अभिनेत्री आशा काळे (Asha kale) यांनी आपल्या अभिनयाच्या जोरावर आपली एक खास ओळख तयार केली. 'अष्टविनायक', 'हा खेळ सावल्यांचा','सासुरवाशीण', 'संसार','तांबडी माती', अशा अनेक चित्रपटातून त्यांनी प्रेक्षकांचे मनोरंजन केलं. त्यांचं 'निंबोणीच्या झाडामागे' हे गाणं तर आजही मराठी प्रेक्षकांच्या मनात रेंगाळतंय. आज मराठी मनोरंजन सृष्टी गाजवलेल्या अभिनेत्री आशा काळे अनेक वर्षांनी एका कार्यक्रमात सर्वांसमोर आल्या. अभिनेता पुष्कर श्रोत्री आयोजित झिम्माडी या कार्यक्रमात त्या सहभागी झाल्या होत्या. या खास प्रसंगी ज्येष्ठ अभिनेत्री आशा काळे यांचा सन्मान करण्यात आला.
वयामुळे आता सिनेमांमध्ये काम करणं बंद केलं असलं तरी काही मोजक्या, विशेष प्रसंगीत दिसतात. वयाचा 77 व्या वर्षीही पूर्वीच्याच ग्रेसने त्या चाहत्यांसमोर आल्या. त्यामुळे उपस्थितही भारवून गेले.
काय म्हणाल्या आशा काळे?
अभिनेत्री आशा काळे यांनी अभिनेता व दिग्दर्शक पुष्कर श्रोत्री याच्या पुढाकारातून आयोजित करण्यात आलेल्या 'झिम्माड' या विशेष पावसाळी पिकनिकमध्ये हजेरी लावली होती. या खास प्रसंगी त्यांचा कृतज्ञता पुरस्काराने सन्मान करण्यात आला. अभिनेत्री किशोरी शहाणे त्यांना मंचापर्यंत घेऊन आल्या. आता वयाच्या मर्यादेमुळे सिनेमात काम करणं बंद केला असला तरी काही विशेष प्रसंगी त्या आवर्जून उपस्थित राहतात. पुरस्कारानंतर त्यांनी उपस्थितांशी संवाद साधला . त्या म्हणाल्या ' आयुष्यात खूप पुरस्कार झाले. पण आजचा हा कृतज्ञता पुरस्कार, खरोखर भारावून गेला. इतका सुंदर सोहळा कला जीवनामध्ये परमेश्वराने माझ्यासाठीच ठेवला होता, इतका छान होता. इथे आल्यानंतर, ज्यांच्यासोबत मी आत्तापर्यंत काम केली, ते सर्व कलाकार भेटायला मिळाले. कुणाबरोबर किती कसं बोलू हे मला सुचत नव्हतं. प्रत्येकाचा चेहरा बघून डोळ्यात पाणी येत होतं. आणि मी खरंच म्हटलं, देवा मला यासाठीच आतापर्यंत ठेवलंस का! आता मला खूप खूप आनंद झालाय.' असं अभिनेत्री आशा काळे म्हणाल्या.
मराठी सिनेसृष्टीतला एक महत्त्वाचा काळ आपल्या अभिनयाने समृद्ध करणाऱ्या आशा काळेंची ‘झिम्माड’मधील उपस्थिती त्यामुळे केवळ एका ज्येष्ठ अभिनेत्रीचा सन्मान नव्हता, तर त्यांच्या कलाप्रवासाला आणि रसिकांच्या मनात त्यांनी निर्माण केलेल्या स्थानाला दिलेली आदराची पावती होती. अनेक वर्षांनी आशा काळे समोर दिसल्याने जुन्या मराठी सिनेमांच्या आठवणींना पुन्हा उजाळा मिळाला..