मुंबई : हल्लीच अभिनेता मिलिंद सोमण यानं आपण कोरोना पॉझिटीव्ह असल्याचं एका सोशल मीडिया पोस्टच्या माध्यमातून सांगितलं होतं. कोरोनाची लागण झाल्याचं निदान होताच मिलिंदनं स्वत:ला क्वारंटाईनही करुन घेतलं. जिथं तो यावरचे पूर्ण उपचारही घेत आहे. असं असतानाच आता धुळवडीच्या आणि होळीच्या निमित्तानं त्यानं एक सोशल मीडिया पोस्ट केली आहे.
मिलिंदनं या पोस्टच्या माध्यमातून खाण्यापिण्याच्या सवयींपासून या दरम्यानच्या काळात आपण नेमकी कशी काळजी घेत आहोत यासंबंधीची माहिती दिली. बरं, त्यानं शेअर केलेल्या फोटोंमध्ये एक व्यक्तीही दिसत आहे. पीपीई किट, मास्क घातलेली ही व्यक्ती आहे तरी कोण जी थेट क्वारंटाईनमध्ये असतानाही मिलिंदला भेटायला गेली आहे असाच प्रश्न नेटकऱ्यांना पडला.
Kareena Kapoor Khan ने शेअर केला थ्रोबॅक फोटो; सोशल मीडियावर होतोय व्हायरल
मिलिंदनंच या प्रश्नाचं उत्तर पोस्टच्या कॅप्शनमध्ये दिलं. होळीच्या निमित्तानं त्याची पत्नी अंकिता ही मिलिंदच्या भेटीला गेली असून, त्याच्यासाठी तिनं आईनं पाठवलेल्या पुरणपोळ्या आणि आंबाही नेला. अर्थात मिलिंदसाठी हे सारंकाही अगदी खासच.
क्वारंटाईनमध्ये असण्याचा 7 वा दिवस आणि होळीच्या निमित्तानं केलेल्या या पोस्टमध्ये त्यानं आपल्या आरोग्याचीही माहिती दिली. चव आणि कोणत्याही वस्तूचा वास न येत असल्याची बाब मांडत त्यानं आपल्याला इतर कोणतीही लक्षणं नसल्याचं स्पष्ट केलं. कोरोना संसर्ग झाल्याच्या या काळात तो शरीर आणि सोबतच मनाला, विचारांनाही विश्रांती देण्यासाठी संपूर्ण दिवस झोपूनच काढत आहे. आरोग्यासाठी ही बाबही तितकीच महत्त्वाची असल्याचं त्यानं इथं स्पष्ट म्हटलं आहे.