Govinda Event Bouncer Paparazzi Fight Viral Video: नव्वदच्या दशकात आपली भन्नाट डान्स स्टाईल आणि जबरदस्त कॉमिक टायमिंगमुळे बॉलिवूडवर (Bollywood News) अधिराज्य गाजवणारा सुपरस्टार गोविंदा (Actor Govinda) या ना त्या कारणानं नेहमीच चर्चेत असतो. कधी तो त्याची बायको सुनीता अहुजा (Sunita Ahuja) हिनं केलेल्या वक्तव्यांवर स्पष्टीकरण देताना दिसतो, तर कधी त्याच्याबाबत पसरलेल्या अफवांवर उत्तर देताना दिसतो. यावेळी मात्र, गोविंदा वेगळ्याच कारणानं चर्चेत आला आहे. गोविंदाच्या एका इव्हेंटमध्ये मोठा गोंधळ झाला आहे.
सोशल मीडियावर समोर आलेल्या व्हिडीओमध्ये गोविंदा स्टेजवर मॉडेल्ससोबत आपल्या जुन्या अंदाजात ठेका धरताना दिसतोय. चाहत्यांना त्याची तीच जुना 'चीची स्टाईल' पुन्हा पाहायला मिळाल्यानं अनेकांनी आनंद व्यक्त केलाय. मात्र, याच कार्यक्रमात घडलेल्या एका प्रकारामुळे सगळ्यांचंच लक्ष वेधलं गेलं आहे. ज्यामध्ये त्याचे बाऊन्सर्स आणि पॅपाराझी यांच्यात जोरदार बाचाबाची झाली असून गोष्टी थेट हाणामारीपर्यंत पोहोचल्याचं दिसून येतंय, ही घटना एका कार्यक्रमादरम्यान घडली.
गोविंदाचे बाऊन्सर्स, पॅपाराझी यांच्यात मोठा वाद (Govinda Bouncers Paparazzi Fight Viral Video)
सुपरस्टार गोविंदा सोमवारी रात्री एका कार्यक्रमाला उपस्थित राहिलेला. या कार्यक्रमात त्यानं काळ्या रंगाचा सूट वेअर केलेला दिसून आला. गोविंदानं या कार्यक्रमात अत्यंत उत्साहानं डान्स केला, गोविंदाला पुन्हा त्याच्या नव्वदीच्या अंदाजात पाहून चाहते भलतेच खूश झाले. त्याचे अनेक व्हिडीओ सध्या सोशल मीडियावर व्हायरल होत आहेत. मात्र, यापैकी एका विशिष्ट व्हिडीओनं सर्वांचं लक्ष वेधून घेतलं आहे. कारण यामध्ये गोविंदाचे बाऊन्सर्स पॅपाराझींवर संतापल्याचं पाहायला मिळतंय.
मोठ्या राड्यानंतर गोविंदानं काय केलं?
सोशल मीडियावर व्हायरल होत असलेल्या एका व्हिडीओमध्ये गोविंदाचे बाऊन्सर्स आणि इव्हेंटसाठी उपस्थित असलेल्या पॅपाराझींमध्ये मोठा वाद झाल्याचं दिसलं. फोटो आणि व्हिडीओ काढण्यावरून हा वाद सुरू झाला आणि परिस्थिती इतकी चिघळली की, बाऊन्सर्सनी पॅपाराझींना रोखण्यासाठी हात लावला आणि मोठा गोंधळ झाला. यावेळी गोविंदा तात्काळ तिथे पोहोचला आणि त्यानं शांतपणे परिस्थिती नियंत्रणात आणण्याचा प्रयत्न केला. त्यानं स्वतःच्या बाऊन्सर्सना आणि पॅपाराझींनाही शांत राहण्याचं आवाहन केलं.
गोविंदाच्या या शांत आणि संयमी स्वभावाचं सोशल मीडियावर कौतुक होत आहे. "योग्य केलं", "गोविंदा खूप शांत स्वभावाचे आहेत" तसेच "तो खरा जेंटलमन आहे", अशा प्रतिक्रिया युजर्सकडून समोर येत आहेत.
दरम्यान, गोविंदा गेल्या काही वर्षांपासून मोठ्या पडद्यापासून दूर आहेत. 208 मध्ये प्रदर्शित झालेल्या रंगीला राजा या सिनेमात गोविंदा शेवटचा झळकला होता. मात्र, विविध इव्हेंट्स आणि सार्वजनिक कार्यक्रमांमध्ये तो कायम दिसत असतो.
अभिनयासोबतच गोविंदा त्यांच्या खासगी आयुष्यामुळेही अनेकदा चर्चेत असतो. त्याची पत्नी सुनीता आहुजा हिच्यासोबतच्या नात्याबाबत सोशल मीडियावर अनेक चर्चा रंगताना दिसतात. दोघे वेगळं राहत असल्याच्या आणि घटस्फोटाच्या चर्चाही अधूनमधून समोर येत असतात. सुनीता आहुजा अनेक मुलाखतींमध्ये गोविंदांवर मिश्कील टोले लगावताना दिसली आहे. तसेच, तिनं कित्येकदा गोविंदाच्या कथित एक्स्ट्रा मॅरिटल अफेअरबाबतही भाष्य केलं आहे. मात्र, गोविंदांनं हे सर्व दावे फेटाळून लावले आहेत.