Aapdi Thaapdi Teaser : अभिनेता श्रेयस तळपदे (Shreyas Talpade) आणि अभिनेत्री मुक्ता बर्वे (Mukta Barve) यांची जोडी दसऱ्याला एक नवीन चित्रपट घेऊन येत आहे. अभिनेता श्रेयस तळपदे आणि अभिनेत्री मुक्ता बर्वे यांच्या 'आपडी थापडी' या बहुचर्चित चित्रपटाचा टीजर लाँच झाला आहे. एक मनोरंजक गोष्ट या चित्रपटातून मांडण्यात आली असून 05 ऑक्टोबरला दसऱ्याच्या मुहूर्तावर हा चित्रपट प्रदर्शित होणार आहे. प्रेक्षकांनी सहकुटुंब चित्रपटगृहात जाऊन हा चित्रपट नक्की पाहण्याचं आवाहन कलाकारांकडून करण्यात आलं आहे. या चित्रपटाची टॅगलाईनही हटके आहे. 'फॅमिलीचा चित्रपट बघा फॅमिली बरोबर' अशी टॅगलाईन असलेल्या या चित्रपटात पाटील कुटुंबाची एक मजेशीर कथा उलगडण्यात येणार आहे.
'आपडी-थापडी' दसऱ्याच्या मुहूर्तावर 05 ऑक्टोबरपासून सिनेमागृहांत!
'आपडी-थापडी' चित्रपट दसऱ्याच्या मुहूर्तावर प्रदर्शित करण्यात येणार आहे. 'के सायलेंट' प्रोडक्शन्सच्या (K Silent Productions) के. सी. पांडे (KC Pandey) यांची निर्मिती आणि प्रस्तुती असलेल्या 'आपडी थापडी' या चित्रपटाचं दिग्दर्शन आनंद करीर यांनी केलं आहे. सुनीता करीर आणि आनंद करीर यांनी या चित्रपटाचं कथा लेखन केलं आहे. अभिनेता श्रेयस तळपदे आणि अभिनेत्री मुक्ता बर्वे यांच्यासह या चित्रपटात नंदू माधव, संदीप पाठक, नवीन प्रभाकर, खुशी हजारे अशा दमदार कलाकारांचा अभिनय या चित्रपटात पाहायला मिळणार आहे. तर सुमन साहू यांनी 'आपडी थापडी' चित्रपटाचं छायांकन आहे.
पाहा चित्रपटाचा टीझर : 'आपडी-थापडी' दसऱ्याच्या मुहूर्तावर सिनेमागृहांत!
कंजुष स्वभाव असलेला सखाराम पाटीलची गोष्ट
अतिशय कंजुष स्वभाव असलेला सखाराम पाटील अर्थात श्रेयस तळपदे, त्याची पत्नी अर्थात मुक्ता बर्वे आणि त्यांची मुलगी असं पाटील कुटुंब या चित्रपटाच्या केंद्रस्थानी आहे. सखाराम पाटीलच्या कंजुषीची उदाहरणं चित्रपटाच्या टीजरमध्ये आपल्याला पाहता येतात. पण या बरोबरच या कथेला एक भावनिक किनार असल्यांचही टीजरमधून दिसतं. त्यामुळे टीजर पाहून पडणाऱ्या प्रश्नांची उत्तरं शोधण्यासाठी आपल्याला दसऱ्याची वाट पाहावी लागणार आहे. आता उत्सुकता आहे ती चित्रपटाच्या ट्रेलरची. 'आपडी-थापडी' ही एक मनोरंजक कथा सहकुटुंब चित्रपटगृहात पाहता येईल.
वाचा इतर महत्त्वाच्या बातम्या :