नवी मुंबई : राष्ट्रवादी काँग्रेसला आणखी एक मोठा धक्का बसला आहे. राष्ट्रवादीचे नेते, माजी मंत्री गणेश नाईक यांच्या भाजपा प्रवेशाचा मुहूर्त अखेर ठरला आहे. येत्या 11 सप्टेंबरला संध्याकाळी 5 वाजता गणेश नाईक मुख्यमंत्री देवेंद्र फडणवीस आणि केंद्रीय मंत्री नितीन गडकरी यांच्या उपस्थितीत भाजपमध्ये प्रवेश करणार आहेत.
गणेश नाईंकांसोबत नवी मुंबई महापालिकेतील राष्ट्रवादीचे 55 नगरसेवक भाजपमध्ये प्रवेश करणार आहेत. कोकण आयुक्तांची भेट घेत उद्या वेगळा गट स्थापन करण्याबाबत तांत्रिक बाबी पूर्ण करण्यात येणार आहेत. वाशीतील सिडको एक्झिबिशन सेंटरमध्ये कार्यकर्त्यांचा मोठा मेळावा घेत हा भाजप प्रवेश होणार आहे, अशी माहिती आहे.
गणेश नाईक यांचे पुत्र संदीप नाईक यांनी आधीच कमळ हाती घेत भाजपचा रस्ता धरला आहे. संदीप नाईक यांनी भाजपात प्रवेश केल्यानंतर राष्ट्रवादीच्या 22 आणि अपक्ष 4 नगरसेवकांनी त्यांना पाठिंबा दिला होता. आता राष्ट्रवादीच्या जवळपास सर्वच नगरसेवकांनी भाजपमध्ये जाण्याचा निर्णय घेतल्याने राष्ट्रवादीची अस्तित्वाची लढाई सुरु आहे.
आमदार संदीप नाईक यांनी 31 जुलै रोजी भाजप प्रवेश केला होता. यावेळी राष्ट्रवादीचे मधुकर पिचड, वैभव पिचड, शिवेंद्रराजे भोसले, चित्रा वाघ आणि काँग्रेसचे वडाळ्याचे आमदार कालिदास कोळंबकर यांचा देखील भाजप प्रवेश झाला होता.